തിരുവനന്തപുരം: അടുത്ത മാസാവസാനത്തോടെ (സെപ്റ്റംബര്) 18 വയസ്സ് കഴിഞ്ഞ എല്ലാവര്ക്കും വാക്സിന് നല്കാനാണ് സര്ക്കാര് ലക്ഷ്യമിടുന്നത് എന്ന് സംസ്ഥാന ആരോഗ്യമന്ത്രി വീണാ ജോജ്ജ് പറഞ്ഞു. 18 വയസിന് മുകളില് പ്രായമുള്ള 52 ശതമാനത്തിന് മുകളില് ഒന്നാം ഡോസും 19 ശതമാനത്തിന് മുകളില് രണ്ടാം ഡോസ് വാക്സിനും നല്കിയിട്ടുണ്ട്. ഇത് ദേശീയ ശരാശരിയേക്കാള് കൂടുതലാണ്. കേരളത്തിനാവശ്യമായ വാക്സിന് നല്കുമെന്നാണ് കേന്ദ്ര ആരോഗ്യ വകുപ്പ് മന്ത്രി അറിയിച്ചിരിക്കുന്നത്. അ ങ്ങനെയെങ്കില് ഈ ലക്ഷ്യം കൈവരിക്കാന് സാധിക്കുമെന്നും മന്ത്രി കൂട്ടിച്ചേര്ത്തു.
കുട്ടികള്ക്കുള്ള വാക്സിനേഷന് സംസ്ഥാനം സജ്ജമാണ്. കേന്ദ്രം അനുമതി നല്കുന്ന മുറയ്ക്ക് നടപടികള് സ്വീകരിക്കും. പരമാവധി പരിശോധനകള് നടത്തി രോഗികളെ കണ്ടെത്താന് സംസ്ഥാനം ശ്രമിക്കുന്നതിനാലാണ് ടി.പി.ആര്. കൂടി നില്ക്കുന്നത്. കേരളത്തില് രോഗബാധയുള്ള ആറിലൊരാളെ പരിശോധനയിലൂടെ കണ്ടെത്തുമ്പോള് ദേശീയ തലത്തില് അത് മുപ്പത്തിമൂന്നില് ഒരാളെ മാത്രമാണ്. കോവിഡ് കേസുകള് കൂടി നില്ക്കുന്നതിനാല് ഓണക്കാലത്ത് എല്ലാവരും ജാഗ്രത പാലിക്കണം. ജീവനും ജീവിതോപാധിയും പ്രധാനമാണ്. സ്വയം പ്രതിരോധമാണ് ഏറ്റവും വലുതെന്നും മന്ത്രി വ്യക്തമാക്കി.
ഡ്രൈവ് ത്രൂ വാക്സിനേഷന് വിജയകരമായാല് കൂടുതല് ജില്ലകളില് വ്യാപിപ്പിക്കുമെന്ന് ആരോഗ്യ വകുപ്പ് മന്ത്രി വീണാ ജോര്ജ് പറഞ്ഞു. 24 മണിക്കൂറും പ്രവര്ത്തിക്കുന്ന ഡ്രൈവ് ത്രൂ വാക്സിനേഷന് സെന്ററിലൂടെ വാഹനത്തിലിരുന്ന് വാക്സിന് സ്വീകരിക്കാം എന്നതാണ് പ്രത്യേകത. വാക്സിനേഷന് സെന്ററിലേക്ക് വരുന്ന വാഹനത്തില് തന്നെ ഇരുന്ന് രജിസ്റ്റര് ചെയ്യാനും വാക്സിന് സ്വീകരിക്കാനും ഒബ്സര്വേഷന് പൂര്ത്തിയാക്കാനും സാധിക്കും. എന്തെങ്കിലും ബുദ്ധിമുട്ടുകളുണ്ടെങ്കില് ആവശ്യമായ വൈദ്യസഹായവും ലഭ്യമാക്കിയിട്ടുണ്ട് - മന്ത്രി വീണാ ജോര്ജ്ജ് പറഞ്ഞു. തിരുവനന്തപുരത്ത് ആരംഭിച്ച 'ഡ്രൈവ് ത്രൂ വാക്സിന് വിജയകരമെങ്കില് സംസ്ഥാനത്താകെ വ്യാപിപ്പിക്കുമെന്നും മന്ത്രി വ്യക്തമാക്കി.
