റാഞ്ചി: ദേശീയ പാത നന്നാക്കണമെന്നാവശ്യപ്പെട്ട് റോഡിലെ ചെളിവെളളത്തില്‍ കുളിച്ച് പ്രതിഷേധിച്ച് കോണ്‍ഗ്രസ് എം എല്‍ എ. ദേശീയ പാത 133 നന്നാക്കണമെന്നാവശ്യപ്പെട്ട് ദീപികാ പാണ്ഡെ സിംഗാണ് വ്യത്യസ്ത പ്രതിഷേധവുമായി റോഡിലിറങ്ങിയത്. കുണ്ടും കുഴിയും നിറഞ്ഞ റോഡിലിരുന്ന് പ്രതിഷേധിച്ച എം എല്‍ എ ചെളിവെളളത്തില്‍ കുളിക്കുകയും ചെയ്തു. ദേശീയപാതയില്‍ അറ്റകുറ്റപ്പണികള്‍ ആരംഭിക്കുന്നതുവരെ പ്രതിഷേധം തുടരുമെന്ന് ദീപികാ പാണ്ഡെ പറഞ്ഞു.
'ഒരുപാട് കാലമായി ദേശീയപാത 133 ശോച്യാവസ്ഥയിലാണ്. ദിവസവും ഇവിടെ അപകടങ്ങളുണ്ടാവുന്നു. റോഡ് തകരാന്‍ കാരണം സംസ്ഥാന സര്‍ക്കാരല്ല. ദേശീയ പാതയുടെ ഉത്തരവാദിത്തം ദേശീയ പാത അതോറിറ്റിക്കാണ്. പലതവണ ആവശ്യപ്പെട്ടിട്ടും അവര്‍ നടപടിയെടുത്തില്ല'- ദീപികാ പാണ്ഡെ സിംഗ് പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
അതേസമയം, എം എല്‍ എയുടെ പ്രതിഷേധത്തെ പരിഹസിച്ച് ബിജെപി നേതാക്കള്‍ രംഗത്തെത്തി. സംസ്ഥാന സര്‍ക്കാരാണ് റോഡിന്റെ ദുരവസ്ഥയ്ക്ക് കാരണം. മുഖ്യമന്ത്രി ഹേമന്ത് സോറനെതിരെയാണോ കോണ്‍ഗ്രസ് എം എല്‍ എയുടെ പ്രതിഷേധം എന്ന് ബിജെപി എംപി നിഷികാന്ത് ദുബെ ചോദിച്ചു. ദേശീയ പാത നന്നാക്കാനായി കേന്ദ്രസര്‍ക്കാര്‍ ആറുമാസം മുന്‍പ് 75 കോടി രൂപ ജാര്‍ഖണ്ഡ് സര്‍ക്കാരിന് നല്‍കിയിരുന്നെന്നും പണി തുടങ്ങാത്തത് എന്തുകൊണ്ടാണെന്ന് സംസ്ഥാന സര്‍ക്കാരിനോട് ചോദിക്കൂ എന്നും നിഷികാന്ത് ട്വീറ്റ് ചെയ്തു.
