ഓസ്ട്രേലിയയിലെ ക്യൂൻസ് ലന്റിൽ മുന്നറിയിപ്പ് ലംഘിച്ച് ജന്മദിനാഘോഷത്തിൽ പങ്കെടുത്ത 24 പേർക്ക് കൊവിഡ്-19. ക്യൂൻസ് ലന്റിലെ നൂസയിലായിരുന്നു ജന്മദിനാഘോഷം. 50 കാരന്റെ ജന്മദിനമാണ് ആഘോഷപൂർവ്വം കൊണ്ടാടിയത്. ഈ മാസം 14 നായിരുന്നു സുഹൃത്തുക്കളും ബന്ധുക്കളും ചേർന്ന് റെസ്റ്റോറന്റിൽ ആഘോഷം സംഘടിപ്പിച്ചത്. പൊതു, സ്വകാര്യ പരിപാടികളിൽ നിന്ന് വിട്ടുനിൽക്കണമെന്ന പ്രാദേശിക ഭരണകൂടം നേരത്തെ മുന്നറിയിപ്പ് നൽകിയിരുന്നു.
കോവിഡ്-19 സ്ഥിരീകരിച്ച എല്ലാവരെയും ആശുപത്രിയിൽ ഐസോലേഷനിൽ പ്രവേശിപ്പിച്ചു. പാർട്ടി നടത്തിയ റെസ്റ്റോറന്റ് പൂട്ടി സീൽ ചെയ്തു. ഇവിടം അണുവിമുക്തമാക്കാനുള്ള നടപടികൾ പുരോഗമിക്കുകയാണ്. പാർട്ടിയിൽ പങ്കെടുത്ത മറ്റുള്ളവരെ കണ്ടെത്താനുളള ശ്രമം ആരംഭിച്ചു. ഇവരുടെ സമ്പർക്കത്തിൽ ഉള്ളവരെ ഹോം ക്വാറന്റൈനിൽ പ്രവേശിപ്പിക്കും. റെസ്റ്റോറന്റിലെ ജീവനക്കാരും നിരീക്ഷണത്തിലാണ്. ജന്മദിന പാർട്ടി സംഘടിപ്പിച്ചവർക്കെതിരെ പൊലീസ് കേസെടുത്തു. 120 ൽ അധികം പേർ ജന്മദിന ആഘോഷത്തിൽ പങ്കെടുത്തു എന്നാണ് പ്രാഥമികമായി ലഭിച്ച വിവരം.
ഓസ്ട്രേലിയയിൽ 2431 പേർക്കാണ് രോഗം സ്ഥിരീകരിച്ചത്. 24 മണിക്കൂറിനുള്ളിൽ 114 പേർ രോഗ ബാധിതരായി. 9 പേരാണ് അസുഖം മൂലം മരിച്ചത്.
