5-ജി മൊബൈല്‍ ടെലി കമ്മ്യൂണിക്കേഷന്‍ ടവറുകളാണ് കൊറോണ വൈറസിന്റെ വ്യാപനത്തിനിടയാക്കിയതെന്ന പ്രചാരണം വ്യാജമാണെന്നും അപകടകരമായ വിഡ്ഢിത്തമാണെന്നും ശാസ്ത്രലോകം. യു.കെ-യിലാണ് വാര്‍ത്ത ആദ്യം പ്രത്യക്ഷപ്പെട്ടത്. അനന്തരഫലമായി ശനിയാഴ്ച യുകെയിലെ നിരവധി സെല്‍ഫോണ്‍ ടവറുകള്‍ ചിലര്‍ അഗ്നിക്കിരയാക്കിയിരുന്നു. ബിർമിങ്ഹാം, ലിവർപൂൾ, മേഴ്സിസൈഡിലെ മെല്ലിങ് എന്നിവിടങ്ങളിലാണ് 5-ജി നെറ്റ്വർക്ക് ടവറുകൾ വ്യാപകമായി നശിപ്പിച്ചത്.
എന്താണ് 5-ജി?
അതിവേഗ ഡാറ്റ കൈമാറ്റം സാധ്യമാക്കുന്ന അഞ്ചാം തലമുറ സാങ്കേതികവിദ്യയാണ് 5-ജി. 4-ജിയെ അപേക്ഷിച്ച് കൂടതൽ വേഗതയിലും ഗുണമേന്മയിലും ഡാറ്റാ കൈമാറ്റം 5-ജിയിൽ സാധ്യമാകുന്നു. ഇൻഡസ്ട്രി അസോസിയേഷൻ 3-ജിപിപി "5-ജി എൻആർ" (5-ജി ന്യൂ റേഡിയോ) സോഫ്റ്റ്‌വേർ ഉപയോഗിക്കുന്ന ഏത് സംവിധാനത്തിനെയും "5-ജി" എന്ന് നിർവചിക്കുന്നു. ഇത് 2018 അവസാനത്തോടെ പൊതുവായ ഉപയോഗത്തിലേക്ക് കൊണ്ടു വന്നു.
ഗൂഢാലോചന സിദ്ധാന്തം
1. 5-ജി സിഗ്നലുകള്‍ നിങ്ങളുടെ ശരീര പ്രതിരോധ ശേഷിയെ ദുര്‍ബലമാക്കുന്നു, ഇത് കൊവിഡിന്‍റെ വ്യാപനത്തിന് കാരണമാകുന്നു.
2. വൈറസ് വ്യാപിക്കുന്നതിന് ഉപയോഗപ്പെടുത്തുന്നത് 5-ജി സിഗ്നലുകളെയാണ്.
ഈ രണ്ട് വാദങ്ങളും 'ശുദ്ധ അസംബന്ധമാണ്' എന്നാണ് റീഡിംഗ് സർവകലാശാലയിലെ സെല്ലുലാർ മൈക്രോബയോളജി അസോസിയേറ്റ് പ്രൊഫസർ ഡോ. സൈമൺ ക്ലാർക്ക് പറയുന്നത്. അദ്ദേഹം ബിബിസി-ക്ക് നല്‍കിയ അഭിമുഖത്തില്‍ പറയുന്നത് ഇപ്രകാരമാണ്: 'നിങ്ങളുടെ രോഗപ്രതിരോധ ശേഷി പല കാര്യങ്ങള്‍കൊണ്ട് കുറയാന്‍ സാധ്യതയുണ്ട്. എന്നാല്‍, 5-ജി തരംഗങ്ങള്‍ക്ക് അതിനു കഴിയില്ല. കാരണം അത് വളരെ കുറഞ്ഞ ഫ്രീക്വന്‍സി തരംഗങ്ങളാണ്. അതും സൂര്യ പ്രകാശത്തേക്കാള്‍ കുറഞ്ഞ ഫ്രീക്വന്‍സിയാണ് ഇവയ്ക്ക്. ഒരു മനുഷ്യന്‍റെ ശാരീരിക സ്ഥിതിയെ സ്വാധീനിക്കാനുള്ള ശേഷിയൊന്നും ഇതിനില്ല'.
