കൊവിഡ്-19 പശ്ചാത്തലത്തിൽ പ്രവാസികളെ നാട്ടിൽ എത്തിക്കണമെന്ന് ആവശ്യപ്പെട്ട് പ്രതിപക്ഷ നേതാവ് രമേശ് ചെന്നിത്തല കേന്ദ്ര വിദേശകാര്യമന്ത്രിക്ക് കത്തയച്ചു. നാട്ടിലേക്ക് വരാൻ ആഗ്രഹിക്കുന്നവരെ മുൻഗണനാക്രമത്തിൽ തിരിച്ചു കൊണ്ടുവരണമെന്നാണ് കത്തിൽ ആവശ്യപ്പെട്ടിരിക്കുന്നത്.
രോഗം ബാധിച്ചവർക്ക് മതിയായ ചികിത്സ നൽകുന്നതിന് കേന്ദ്ര സർക്കാർ നയതന്ത്ര തലത്തിൽ ഇടപെടണം. ഇന്ത്യൻ എംബസി നിരീക്ഷണ കേന്ദ്രങ്ങൾ ആരംഭിക്കണം. തൊഴിൽ നഷ്ടപ്പെട്ടവർക്കും ശമ്പളമില്ലാതെ അവധിയിൽ പോയവർക്കും അടിയന്തര സഹായം എത്തിക്കണം. ടൂറിസ്റ്റ് വിസയിലെത്തിയ കുടുങ്ങിയവരുടെ വിസ പുതുക്കണം. മടങ്ങിയെത്തുന്നവർക്ക് പുനരധിവാസ പദ്ധതിയും ചെറിയ പലിശനിരക്കിൽ വായ്പയും ലഭ്യമാക്കമെന്നും രമേശ് ചെന്നിത്തല കേന്ദ്ര വിദേശകാര്യ മന്ത്രിയോട് ആവശ്യപ്പെട്ടു.