മുഖ്യമന്ത്രി പിണറായി വിജയനെതിരെ വിമര്ശനവുമായി കെ പി സി സി പ്രസിഡന്റ് കെ സുധാകരന്. കോൺഗ്രസ് ഏതൊക്കെ സംസ്ഥാനത്ത് എത്ര ദിവസം ജാഥ നടത്തണമെന്ന് പറയാൻ പിണറായി വിജയൻ ആരാണെന്ന് കെ സുധാകരന് ചോദിച്ചു. ഇന്ത്യയിൽ ബിജെപിയെ വളർത്താൻ വെള്ളവും വളവുമേകിയ ഇ എം ശങ്കരൻ നമ്പൂതിരിപ്പാടിൻ്റെ പിൻമുറക്കാരിൽ നിന്ന് ഞങ്ങൾ ബിജെപി വിരുദ്ധത തെല്ലും പ്രതീക്ഷിക്കുന്നില്ലെന്നും അദ്ദേഹം ഫേസ്ബുക്കില് കുറിച്ചു.
ഫേസ്ബുക്ക് പോസ്റ്റിന്റെ പൂര്ണരൂപം
ഇന്ത്യൻ നാഷണൽ കോൺഗ്രസ് ഏതൊക്കെ സംസ്ഥാനത്ത് എത്ര ദിവസം ജാഥ നടത്തണമെന്ന് പറയാൻ പിണറായി വിജയൻ ആരാണ്? കേരളത്തിലാരും BJPക്കെതിരെ പ്രവർത്തിക്കരുതെന്നാണ് പിണറായി പരോക്ഷമായി പറയുന്നത്. സംഘപരിവാറിനെതിരെ കന്യാകുമാരിയിൽ നിന്ന് കാശ്മീരിലേക്ക് ഒരു യാത്ര നടക്കുമ്പോൾ ബിജെപിയുടെ ഏറാൻ മൂളിയായ കേരള മുഖ്യമന്ത്രിക്ക് അസ്വസ്ഥതയുണ്ടാകും. ഇന്ത്യയിൽ ബിജെപിയെ വളർത്താൻ വെള്ളവും വളവുമേകിയ ഇ.എം.ശങ്കരൻ നമ്പൂതിരിപ്പാടിൻ്റെ പിൻമുറക്കാരിൽ നിന്ന് ഞങ്ങൾ ബിജെപി വിരുദ്ധത തെല്ലും പ്രതീക്ഷിക്കുന്നില്ല.
നരേന്ദ്രമോദിയുടെ പേര് പറയാൻ പോലും മുട്ടിടിക്കുന്ന പിണറായി വിജയൻ ബിജെപിയെ നേരിടാൻ കോൺഗ്രസ്സിനെ പഠിപ്പിക്കേണ്ട. കേരളത്തിൽ ബിജെപിയുടെ നാവായി സിപിഎം പ്രവർത്തിക്കുന്നത് രാഷ്ട്രീയ കേരളത്തിന് ഒന്നടങ്കം നാണക്കേടാണ്. "ഭാരത് ജോഡോ യാത്ര" ഇന്ത്യയുടെ ഹൃദയത്തിലൂടെയാണ് കടന്നു പോകുന്നത്. പിണറായി വിജയനെ ഉപയോഗിച്ച് ബിജെപി ഭരിക്കുന്ന കേരളത്തിലൂടെ മാത്രമല്ല, സംഘപരിവാറിൻ്റെ ശക്തികേന്ദ്രങ്ങളിലെല്ലാം തന്നെ കോൺഗ്രസ് കടന്നു ചെന്നിരിക്കും, അതിനെതിരെ പിണറായി വിജയൻ എത്ര വിലപിച്ചാലും!
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക