ഇന്നും ഇന്നലെയുമായി സംസ്ഥാനത്ത് എത്തിയ 10 പേർക്ക് കൊവിഡ് ലക്ഷണങ്ങൾ. ട്രെയിൻ, വിമാന മാർഗങ്ങളിലൂടെ എത്തിയവർക്കാണ് വൈറസ് ബാധ സംശയിക്കുന്നത്. തിരുവന്തപുരത്ത് രാജധാനി എക്സ്പ്രസിൽ എത്തിയ ഒരാൾക്കും കുവൈത്തിൽ നിന്ന് എത്തിയ 4 പേരും ഇതിൽ ഉൾപ്പെടും. ഇവരെ തിരുവനന്തപുരരത്തെ ഐസൊലേഷൻ കേന്ദ്രത്തിലേക്കാണ് മാറ്റിയത്. ദുബായിൽ നിന്ന് കൊച്ചിയിലെത്തിയ മൂന്ന് പേർക്കാണ് രോഗലക്ഷണമുള്ളത്. ഇവരെ കളമശ്ശേരി മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. സലാലയിൽ നിന്ന് കരിപ്പൂരിലെത്തിയ രണ്ടു പേർക്ക് രോഗലക്ഷണമുണ്ട്. ഇവരെ കോഴിക്കോട് മെഡിക്കൽ കോളേജിൽ പ്രവേശിപ്പിച്ചു. സ്രവപരിശോധനാ ഫലം വൈകീട്ട് ലഭിക്കും.
എറണാകുളം ജില്ലയിൽ 13 പേരാണ് ചികിത്സയിലുള്ളത്. കളമശ്ശേരി മെഡിക്കൽ കോളേജിൽ 12 ഉം സ്വകാര്യ ആശുപത്രിയിൽ ഒരാളുമാണ് ഉള്ളത്. നാല് പേർമാത്രമാണ് ഇതിൽ എറണാകുളം ജില്ലക്കാർ. വന്ദേഭാരത് മഷനിൽ ഇന്ന് രാത്രി ഗൾഫിൽ നിന്ന് ഒരു വിമാനം നെടുമ്പാശേരിയിൽ എത്തും. ആടുജീവിതം എന്ന സിനിമയുടെ ഷൂട്ടിംഗ് പൂർത്തിയാക്കി നടൻ പൃഥ്വിരാജും സംവിധായകൻ ബ്ലസിയും നാളെ രാവിലെ നെടുമ്പാശേരിയിൽ എത്തും. ചാർട്ടേഡ് ഫ്ലൈറ്റിലാണ് ജോർദാനിൽ നിന്ന് ഇവർ വരുന്നത്.
