ചിയാന് വിക്രമിന്റെ ഏറ്റവും പുതിയ ചിത്രം കോബ്രയിലെ ആദ്യ ഗാനം പുറത്തിറങ്ങി. തുമ്പി തുള്ളല് എന്ന് പേരിട്ടിരിക്കുന്ന റൊമാന്റിക് മെലഡി സംഗീതം നല്കിയത് എ ആര് റഹ്മാനാണ്. ദില് സേയിലെ ''ജിയ ജലെ'' പോലുള്ള ഭാഗികമായ മലയാള ഗാനമാണ് തുമ്പി തുള്ളല്. ആകര്ഷകമായ മലയാള കോറസും തമിഴ് വരികളും ഗാനത്തെ മധുരമാക്കുന്നു. ഗാനത്തില് ശ്രുതിമധുരമായ ''നാഗുമോമു'' രാഗവും ഉള്പ്പെടുത്തിയിട്ടുണ്ട്. മറ്റ് റഹ്മാന് ഗാനങ്ങളെ പോലെ തുമ്പി തുള്ളലും പ്രേക്ഷകര് ഏറ്റെടുക്കമെന്നതില് സംശയമില്ല.
ശ്രേയ ഘോഷലും നകുല് അഭിനങ്കറും ചേര്ന്നാണ് ഗാനം ആലപിച്ചിരിക്കുന്നത്. വിവേക്, ജിതിന് രാജ് എന്നിവരാണ് ഗാനം എഴുതിയത്. ഗാനം പുറത്തിറങ്ങിയതില് പിന്നെ കോബ്രയില് വിക്രം അവതരിപ്പിക്കുന്ന കഥാപാത്രങ്ങളിലൊന്ന് മലയാളിയാണെന്നാണ് പ്രേക്ഷകരുടെ അനുമാനം. നേരത്തെ പുറത്തിറക്കിയ ചിത്രത്തിന്റെ ഫസ്റ്റ് ലുക്ക് പോസ്റ്ററില് വിക്രമിന്റെ ഏഴ് വ്യത്യസ്ത ഗെറ്റപ്പുകള് കാണിച്ചിരുന്നു. ഡെമോണ്ടെ കോളനി, ഇമൈക്ക നോഡിഗല് എന്നീ ചിത്രങ്ങളിലൂടെ പ്രശസ്തനായ അജയ് ജ്ഞാനമുത്തുമാണ് കോബ്രയുടെ സംവിധായകന്. ചിത്രം ഒരേസമയം തമിഴ്, തെലുങ്ക്, ഹിന്ദി ഭാഷകളില് റിലീസ് ചെയ്യും.