ഓഗസ്റ്റിലോ സെപ്റ്റംബറിലോ രാജ്യത്തെ സ്കൂളുകള്‍ തുറക്കുന്നതു സംബന്ധിച്ച് രക്ഷിതാക്കളോട് അഭിപ്രായം തേടണമെന്ന് കേന്ദ്ര മാനവ വിഭവശേഷി മന്ത്രാലയം. ഇതു സംബന്ധിച്ച് സംസ്ഥാനങ്ങള്‍ക്കും കേന്ദ്രഭരണ പ്രദേശങ്ങള്‍ക്കും മന്ത്രാലയം കത്തയച്ചു. മൂന്നു ദിവസത്തിനകം മറുപടി നല്‍കാനാണ് ജൂലൈ 17-ന് അയച്ച കത്തില്‍ ആവശ്യപ്പെട്ടിരിക്കുന്നത്.
ഓഗസ്റ്റ് / സെപ്റ്റംബർ / ഒക്ടോബർ എന്നീ മാസങ്ങളിൽ എപ്പോള്‍ സ്കൂളുകൾ തുറക്കാനാണ് രക്ഷിതാക്കൾ താല്‍പര്യപ്പെടുന്നത്, വീണ്ടും തുറക്കുമ്പോൾ സ്കൂളുകളിൽ നിന്നും മാതാപിതാക്കൾ എന്തെല്ലാമാണ് പ്രതീക്ഷിക്കുന്നത് എന്നീ കൃത്യമായ രണ്ടു ചോദ്യങ്ങള്‍ കത്തിലൂടെ ചോദിക്കുന്നുണ്ട്.
അതേസമയം, തിങ്കളാഴ്ചക്കകം മറുപടി നല്‍കണമെന്ന് ആവശ്യപ്പെട്ടിട്ടുണ്ടെങ്കിലും, പല സ്കൂളുകളും ഇതുവരെ ഈ തീരുമാനത്തെക്കുറിച്ച് അറിഞ്ഞിട്ടില്ല. ജൂൺ 29 ന് ആഭ്യന്തര മന്ത്രാലയം പ്രഖ്യാപിച്ച അൺലോക്ക് -2 മാർഗ്ഗനിർദ്ദേശങ്ങൾ പ്രകാരം സ്കൂളുകൾ, കോളേജുകൾ, വിദ്യാഭ്യാസ, കോച്ചിംഗ് സ്ഥാപനങ്ങൾ എന്നിവയെല്ലാം 2020 ജൂലൈ 31 വരെ അടച്ചിടാൻ ഉത്തരവിട്ടിരുന്നു.
