ഡല്ഹി: രാജ്യത്ത് കോവിഡ് വാക്സിനേഷന്റെ രണ്ടാം ഘട്ടം ഇന്ന് തുടങ്ങും. കോവിഡ് അനുബന്ധ പട്ടികയില് വരുന്ന 20ലധികം രോഗങ്ങള് അലട്ടുന്നവരെയാണ് രണ്ടാംഘട്ട വാക്സിനേഷനുള്ള പരിഗണനാ ലിസ്റ്റില് ഉള്പ്പെടുത്തിയിരിക്കുന്നത്. ആരോഗ്യ പ്രവര്ത്തകര്ക്കും കോവിഡ് മുന്നണി പോരാളികള്ക്കും ആയിരുന്നു ഒന്നാംഘട്ട വാക്സിനേഷന്. ഇതിന്റെ തുടര്ച്ചയായാണ് ഇന്ന് രണ്ടാം ഘട്ടം ആരംഭിക്കുന്നത്.
കേരളത്തിലും രണ്ടാംഘട്ട വാക്സിനേഷനുള്ള രജിസ്ട്രേഷന് ഇന്ന് മുതല് ആരംഭിക്കുമെന്ന് ആരോഗ്യ വകുപ്പ് അറിയിച്ചു. 60 വയസിന് മുകളില് പ്രായമുള്ള എല്ലാ പൗരന്മാര്ക്കും 45 നും 59 നും ഇടയില് പ്രായമുള്ള മറ്റ് രോഗബാധിതര്ക്കുമാണ് രജിസ്ട്രേഷന് അനുവദിക്കുന്നത്. കേന്ദ്ര ആരോഗ്യ മന്ത്രാലയത്തിന്റെ മാര്ഗ നിര്ദേശമനുസരിച്ച് സംസ്ഥാനത്തെ വിവിധ സര്ക്കാര് ആശുപത്രികള്ക്ക് പുറമേ തെരഞ്ഞെടുക്കപ്പെട്ട സ്വകാര്യ ആശുപത്രികളിലും വാക്സിനെടുക്കാനുള്ള സൗകര്യം ലഭ്യമാണ്.
സര്ക്കാര് ആശുപത്രികളില് വാക്സിന് സൗജന്യമായി നല്കും. അതേസമയം, സ്വകാര്യ ആശുപത്രികള് ഒരു ഡോസ് വാക്സിന് 250 രൂപ ഈടാക്കും. ഇതില് 100 രൂപ സ്വകാര്യ ആശുപത്രികളുടെ സര്വീസ് ചാര്ജാണ്. കോവിന് പോര്ട്ടല് വഴിയും (https://www.cowin.gov.in) ആരോഗ്യ സേതു ആപ്പ് വഴിയുമാണ് വാക്സിൻ സ്വീകരിക്കാൻ രജിസ്റ്റര് ചെയ്യേണ്ടത്. ഫോട്ടോ, തിരിച്ചറിയല് കാര്ഡിലുള്ള അടിസ്ഥാന വിവരങ്ങള് എന്നിവ നല്കണം. മൊബൈല് നമ്പറിന്റെ കൃത്യത ഉറപ്പാക്കാന് ഒറ്റത്തവണ പാസ് വേഡും ഉപയോഗിക്കണം.
വാക്സിനെടുക്കാന് എത്തുമ്പോള് ആധാര് കാര്ഡ് ഹാജരാക്കണം. മറ്റ് അംഗീകൃത ഫോട്ടോ പതിപ്പിച്ച തിരിച്ചറിയല് കാര്ഡുകളും സ്വീകരിക്കും. 45 മുതല് 59 വയസ്സ് വരെയുള്ളവരാണെങ്കില് ഡോക്ടര് സാക്ഷ്യപ്പെടുത്തിയ സര്ട്ടിഫിക്കറ്റ് ഹാജരാക്കണം.