തിരുവനന്തപുരം: രാജ്യസഭാ തെരഞ്ഞെടുപ്പ് മാറ്റിവെച്ചത് ഭരണഘടന വിരുദ്ധമാണെന്ന് മുഖ്യമന്ത്രി പിണറായി വിജയന്‍. തെരഞ്ഞെടുപ്പ് കമ്മിഷന്‍റെ അധികാര പരിധിയില്‍ ഇടപെടാന്‍ കേന്ദ്ര സര്‍ക്കാരിന് അനുവാദമില്ലെന്നും മുഖ്യമന്ത്രി കൂട്ടിചേര്‍ത്തു. രാജ്യസഭാ അംഗങ്ങളെ തെരഞ്ഞെടുക്കുന്നത് നിയമസഭാഗങ്ങളുടെ ഭരണഘടനാപരമായ അവകാശമാണ്. അതില്‍ ആരും കൈകടത്താന്‍ പാടില്ല, എന്തിനാണ് തെരഞ്ഞെടുപ്പ് മാറ്റിയതെന്ന് വ്യക്തമാക്കണമെന്നും മുഖ്യമന്ത്രി പറഞ്ഞു.
രാജ്യസഭാംഗങ്ങളായ വയലാര്‍ രവി, കെ.കെ രാഗേഷ്, അബ്ദുള്‍ വഹാബ് എന്നിവരുടെ കാലാവധി കഴിയുന്ന ഒഴിവിലേക്ക് നടക്കേണ്ട തെരഞ്ഞെടുപ്പാണ് ഇപ്പോള്‍ മാറ്റിവെച്ചിരിക്കുന്നത്. ഈ മൂന്ന് എം.പി മാരുടെയും കാലാവധി ഏപ്രില്‍ 21ന് അവസാനിക്കും. മാര്‍ച്ച്‌ 31ന് മുന്‍പ് നാമനിര്‍ദ്ദേശക പത്രിക സമര്‍പ്പണമുള്‍പ്പെടെ എല്ലാ നടപടികളും പൂര്‍ത്തിയാക്കാനായിരുന്നു ആദ്യം തെരഞ്ഞെടുപ്പ് കമ്മിഷന്‍ ഉത്തരവിട്ടത്. കേന്ദ്ര നിയമ മന്ത്രാലയത്തിന്‍റെ ശുപാര്‍ശ പ്രകാരമാണ്, ഏപ്രില്‍ 12ന് നടക്കാനിരുന്ന തെരഞ്ഞെടുപ്പ് മാറ്റിവെച്ചത്.
