റിയാദ്: റംസാനിലെ ഉംറ നിര്‍വഹിക്കാന്‍ പ്രതിരോധ കുത്തിവെപ്പ് നിര്‍ബന്ധമാക്കി സൗദി ഹജ്ജ് ഉംറ മന്ത്രാലയം. കൊവിഡ്‌ പ്രതിരോധ കുത്തിവെപ്പ് സ്വീകരിച്ചവര്‍, മക്ക മദീന സന്ദര്‍ശനത്തിന് 14 ദിവസം മുന്‍പെങ്കിലും വാക്സിന്‍ ആദ്യ ഡോസ് എടുത്തവര്‍, കൊവിഡ്‌ ബാധിച്ച് രോഗമുക്തി നേടിയ ശേഷം 14 ദിവസം പിന്നിട്ടവര്‍ എന്നിങ്ങനെ മൂന്ന് വിഭാഗക്കാര്‍ക്കാണ് പ്രവേശന അനുമതിയുള്ളത്.
കൊവിഡ്‌ പ്രതിരോധ പ്രവര്‍ത്തനങ്ങളുടെ ഭാഗമായി ഉംറക്ക് എത്തുന്നവര്‍ സൗദിയുടെ 'തവല്‍ക്കന' ആപ്പിലും, ഉംറ ആപ്പായ 'ഇഅതമര്‍ന' ആപ്പിലും രജിസ്ടര്‍ ചെയ്യണമെന്ന് മന്ത്രാലയം അറിയിച്ചു. ഇതിന്‍റെ ഭാഗമായി റംസാന്‍ ആദ്യ ദിനം മുതല്‍ ഉംറക്കും ഗ്രാന്‍ഡ്‌ മോസ്ക് സന്ദര്‍ശിക്കാന്‍ അനുവാദമുണ്ടാകും.
ഉംറ നിര്‍വഹിക്കാന്‍ കൊവിഡ്‌ പ്രതിരോധ കുത്തിവെപ്പ് ആവിശ്യമില്ലന്നായിരുന്നു അധികൃതര്‍ നേരത്തെ അറിയിച്ചിരുന്നത്. തീര്‍ഥാടകരുടെയും, സന്ദര്‍ശകരുടെയും ആരോഗ്യ പ്രവര്‍ത്തകരുടെയും സുരക്ഷ കണക്കിലെടുത്താണ് പുതിയ തീരുമാനം.
റമദാന്‍ മാസത്തില്‍ അഞ്ച് ലക്ഷത്തിലേറെ ഉംറ തീര്‍ത്ഥാടകര്‍ പുണ്യഭൂമിയിലെത്തുമെന്നാണ് പ്രതീക്ഷ. വിദേശ രാജ്യങ്ങളില്‍ നിന്നെത്തുന്ന തീര്‍ത്ഥാടകര്‍ വാക്സിന്‍ സ്വീകരിച്ചവരാണെങ്കിലും, സൗദിയിലെത്തിയാല്‍ 3 ദിവസം ക്വാറന്റൈന്‍ പൂര്‍ത്തിയാക്കണം.
