70 കാരനുമായി വിവാഹം നിശ്ചയിച്ചതിനെ തുടർന്ന് 21 വയസ്സുള്ള പെൺകുട്ടി ജീവനൊടുക്കി. ഷാർജയിലെ മുവയ്ലിയയിലാണ് പെൺകുട്ടി അഞ്ചാം നിലയിൽ നിന്ന് ചാടി ആത്മഹത്യ ചെയ്തത്. വിവാഹത്തിന് പെൺകുട്ടി കടുത്ത എതിർപ്പ് പ്രകടിപ്പിച്ചിരുന്നുവെന്ന് പൊലീസ് വെളിപ്പെടുത്തി. വിവാഹം വേണ്ടെന്നും പഠനവുമായി മുന്നോട്ട് പോകണമെന്നുമായിരുന്നു പെൺകുട്ടിയുടെ ആവശ്യം. എന്നാൽ 70 കാരനുമായി വീട്ടുകാർ വിവാഹം ഉറപ്പിക്കുകയായിരുന്നു. ഇതുമായി ബന്ധപ്പെട്ട് എതാനും ദിവസമായി വീട്ടിൽ കലഹം പതിവായിരുന്നു.
ചൊവ്വാഴ്ച രാവിലെയാണ് കുടുംബം താമസിക്കുന്ന കെട്ടിടത്തിന്റെ അഞ്ചാം നിലയിൽ നിന്ന് പെൺകുട്ടി ചാടിയത്. പ്രദേശവാസികൾ വിവരം അറിയിച്ചതിനെ തുടർന്ന് പൊലീസ് സ്ഥാലത്തെത്തി പെൺകുട്ടിയെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. തലയോട്ടിക്ക് ഏറ്റ ഗുരുതരമായ പരിക്കാണ് മരണ കാരണം. ശ്വാസകോശത്തിൽ രക്തസ്രാവം ഉണ്ടായിരുന്നു. പെൺകുട്ടിയുടേയോ കുടുംബാംഗങ്ങളുടേയോ പേരു വിവരങ്ങൾ പൊലീസ് പുറത്തുവിട്ടിട്ടില്ല. പെൺകുട്ടിയുടെ മാതാപിതാക്കളെയും കുടുംബാഗങ്ങളും പൊലീസ് കസ്റ്റഡിയിലാണ്. കൂടുതൽ അന്വേഷണത്തിനായി കേസ് പബ്ലിക്ക് പ്രോസിക്യൂട്ടർക്ക് പൊലീസ് ഉടൻ കൈമാറും.
