ചെന്നൈ: തമിഴ്നാട്ടില് നാളെ മുതല്‍ രാത്രികാല കര്‍ഫ്യുവും, ഞായറാഴ്ച്ചകളില്‍ ലോക് ഡൌണും ഏര്‍പ്പെടുത്തി. കൊവിഡ് വ്യാപനം അതിരൂക്ഷമായി തുടരുന്ന സാഹചര്യത്തിലാണ് തമിഴ്നാട് സര്‍ക്കാര്‍ ഇങ്ങനെയൊരു തീരുമാനം എടുത്തിരിക്കുന്നത്.
അടിയന്തര മെഡിക്കല്‍ സേവനങ്ങള്‍, പെട്രോള്‍ പമ്പുകള്‍, വ്യാവസ സ്ഥാപനങ്ങള്‍, എന്നിവയെ രാത്രികാല കര്‍ഫ്യുവില്‍ നിന്ന് ഒഴിവാക്കിയിട്ടുണ്ട്. രാത്രി പത്തുമണി മുതല്‍ വെളുപ്പിന് 4 മണി വരെയാണ് കര്‍ഫ്യൂ. സമ്പൂര്‍ണ ലോക് ഡൌണ്‍ ദിവസമായ ഞായറാഴ്ച്ച, ഹോട്ടലുകളില്‍ ഹോം ഡെലിവറി സൗകര്യം ഉണ്ടായിരിക്കും. ആളുകള്‍ കൂടുതലായി കൂട്ടം കൂടുന്ന മാര്‍ക്കറ്റുകള്‍, സിനിമ തിയേറ്ററുകള്‍, ഷോപ്പിംഗ്‌ കോംപ്ലക്സുകള്‍ എന്നിവയെല്ലാം അടഞ്ഞു കിടക്കും. രോഗ വ്യാപനത്തെ തുടര്‍ന്ന് പ്ലസ്‌ ടു പരീക്ഷകള്‍ മാറ്റി വെച്ചു. എന്നാല്‍ പ്രാക്ടിക്കല്‍ പരീക്ഷകള്‍ നേരത്തെ തീരുമാനിച്ച തിയതികളില്‍ നടക്കും.
തമിഴ്നാട്ടില് പുതിയതായി 10,694 കൊവിഡ് കേസുകളാണ് റിപ്പോര്‍ട്ട്‌ ചെയ്തത്. മൊത്തം 70,391 കേസുകളാണ് സംസ്ഥാനത്തുള്ളത്. രാജ്യത്ത് കഴിഞ്ഞ ഇരുപത്തിനാല് മണിക്കൂറിനിടെ രണ്ടുലക്ഷത്തി എഴുപത്തിമുവായിരത്തി എണ്ണൂറ്റിപ്പത്ത് പേര്‍ക്കാണ് രോഗം സ്ഥിരീകരിച്ചത്. ഇതോടെ ആകെ രോഗബാധിതരുടെ എണ്ണം 1,50,61,919 ആയി. ഇന്നലെ മാത്രം കൊവിഡ് മൂലം 1618 പേര്‍ക്കാണ് ജീവന്‍ നഷ്ടമായത്. ആകെ മരണം 1,78,769 ആയി. തുടര്‍ച്ചയായ അഞ്ചാം ദിവസമാണ് രാജ്യത്ത് രോഗികളുടെ എണ്ണം രണ്ട് ലക്ഷം കടക്കുന്നത്. 19,29,329 പേരാണ് നിലവില്‍ ചികിത്സയിലുളളത്. 1,29,53,821 പേര്‍ രോഗമുക്തരായി. 12,38,52,566 പേരാണ് ഇതുവരെ കൊവിഡിനെതിരായ വാക്‌സിന്‍ സ്വീകരിച്ചത്.
