അമിതവണ്ണമുള്ള പെൺകുട്ടികളിൽ ഹൃദയ സംബന്ധമായ അസുഖങ്ങൾക്ക് സാധ്യത കൂടുതലെന്ന് പുതിയ പഠനം. അമിതവണ്ണം മൂലമുണ്ടാകുന്ന ജീവിത ശൈലി പ്രശ്നങ്ങളായ അതി രക്തസമ്മർദ്ദവും, രക്തത്തിലെ ഉയർന്ന കൊളെസ്ട്രോളിൻ്റെ അളവ് കൂടുമ്പോഴുമാണ് പെൺകുട്ടികളിൽ ഹൃദയ സംബന്ധമായ അസുഖങ്ങൾക്ക് സാധ്യത കൂടുതല്‍.
ബ്രസീലില്‍ നടന്ന പഠനത്തില്‍ 92 കൗമാരക്കാരാണ് പങ്കെടുത്തത്. ഈ പുതിയ പഠനം 'ഫ്രോണ്ടിയേഴ്‌സ് ഇൻ ന്യൂട്രിഷൻ' എന്ന ജേർണലിലാണ് പ്രസിദ്ധീകരിച്ചത്. സാവോ പൗളോ ബയോ-മെഡിക്കൽ സയൻസസ് സർവകലാശാലയും, സാവോ പൗളോ സാന്ത കാസ മെഡിക്കൽ സ്കൂളിലെ ശാസ്ത്രജ്ഞന്മാരുമാണ് പഠനത്തിന് നേതൃത്വം നല്‍കിയത്. അമിതവണ്ണമുള്ള പെൺകുട്ടികളിൽ സാധാരണ പെൺകുട്ടികളെ അപേക്ഷിച്ച് ലിപിഡ് പ്രൊഫൈൽ വ്യതിയാനങ്ങൾ പ്രകടമാണെന്നും ഇവരിൽ പ്രായമാകുമ്പോൾ ഹൃദയ സംബന്ധമായ അസുഖങ്ങൾക്ക് സാധ്യത കൂടുതലാണെന്നും ശാസ്ത്രജ്ഞർ ചൂണ്ടിക്കാട്ടുന്നു.
അമിത വണ്ണമുള്ള ആണ്‍കുട്ടികളില്‍, ആൺകുട്ടികളെ അപേക്ഷിച്ച് ലിപിഡ് പ്രൊഫൈലിൽ കാര്യമായ വ്യത്യാസങ്ങൾ പരീക്ഷണത്തില്‍ പ്രകടമായിട്ടില്ല. കുട്ടികളിലെ അമിത വണ്ണം ശാസ്ത്രജ്ഞർക്കും ആരോഗ്യ പ്രവർത്തകർക്കും പുതിയ ആശങ്കക്ക് കാരണമായിട്ടുണ്ട്. 2016- ലെ ലോകാരോഗ്യ സംഘടനയുടെ കണക്കു പ്രകാരം 5 മുതൽ 19 വയസ്സു വരെയുള്ള കുട്ടികളിൽ ഏകദേശം 34 കോടിയോളം കുട്ടികളെങ്കിലും അമിതവണ്ണം ഉള്ളവരാണ്.
