ജൊഹന്നാസ്ബര്‍ഗ്: ദക്ഷിണാഫ്രിക്കയില്‍ ഇന്ത്യക്കാര്‍ക്കും ഇന്ത്യന്‍ വംശജര്‍ക്കുമെതിരെ നടക്കുന്ന ആക്രമണങ്ങളില്‍ ആശങ്കയറിയിച്ച് കേന്ദ്രസര്‍ക്കാര്‍. ദക്ഷിണാഫ്രിക്കന്‍ വിദേശകാര്യ മന്ത്രി ഡോ. നദേലി പാന്‍ഡോറുമായി വിദേശകാര്യമന്ത്രി എസ് ജയശങ്കര്‍ ആശങ്കകള്‍ പങ്കുവച്ചു. ക്രമസമാധാനം നിലനിര്‍ത്താനായി സര്‍ക്കാര്‍ പരമാവധി ശ്രമിക്കുന്നുണ്ടെന്ന് ദക്ഷിണാഫ്രിക്ക ഉറപ്പുനല്‍കിയിട്ടുണ്ട്.
'ദക്ഷിണാഫ്രിക്കന്‍ വിദേശകാര്യമന്ത്രി നദേലി പാന്‍ഡോറുമായി സംസാരിച്ചു. ക്രമസമാധാനം നിലനിര്‍ത്താനായി സര്‍ക്കാര്‍ അങ്ങേയറ്റം ശ്രമിക്കുന്നുണ്ടെന്ന് അവര്‍ ഉറപ്പുനല്‍കി. രാജ്യത്തെ സാധാരണ നിലയിലേക്ക് തിരിച്ചെത്തിച്ച് സമാധാനം പുനസ്ഥാപിക്കുന്നതിനാണ് പ്രഥമ പരിഗണന നല്‍കുകയെന്നും ജയ്ശങ്കര്‍ ട്വീറ്റ് ചെയ്തു'.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
മുന്‍ ദക്ഷിണാഫ്രിക്കന്‍ പ്രസിഡന്റ് ജേക്കബ് സുമയെ അഴിമതി ആരോപണത്തിന്റെ പേരില്‍ അറസ്റ്റ് ചെയ്തതിനുപിന്നാലെ അദ്ദേഹത്തിന്റെ അനുയായികളാണ് ദക്ഷിണാഫ്രിക്കയില്‍ വ്യാപകമായി അക്രമങ്ങള്‍ അഴിച്ചുവിടുന്നത്. 79-കാരനായ ജേക്കബ് സുമയ്ക്ക് 15 മാസം തടവാണ് കോടതി വിധിച്ചത്. ഇതോടെ പ്രകോപിതരായ സുമ അനുകൂലികള്‍ റോഡുകളും ഹൈവേകളും തടഞ്ഞു. ഡര്‍ബന്‍, ജോഹന്നാസ്ബര്‍ഗ്, പീറ്റര്‍മാരിറ്റ്‌സ് തുടങ്ങി ഇന്ത്യക്കാര്‍ കൂടുതല്‍ താമസിക്കുന്ന പ്രദേശങ്ങളിലാണ് അക്രമമുണ്ടായത്.
