തിരുവനന്തപുരം: തനിക്കെതിരായി വരുന്ന ട്രോളുകള്‍ക്ക് മറുപടിയുമായി ഷാഫി പറമ്പില്‍ എംഎല്‍എ. ട്രോളുകളെ ആ സ്പിരിട്ടില്‍ മാത്രമേ എടുക്കുന്നുളളു. ഞങ്ങള്‍ നൂറ് കിലോമീറ്റര്‍ സൈക്കിള്‍ ചവിട്ടുന്നുവെന്ന് പറഞ്ഞിട്ട് 99.9 അല്ല 106 കിലോമീറ്ററേ ആയുളളു. വീട്ടില്‍ ഇരുന്നിട്ടല്ലലോ പുറത്തിറങ്ങി പണിയെടുക്കുന്നതുകൊണ്ടാണല്ലോ ഇങ്ങനെയെല്ലാം കേള്‍ക്കേണ്ടിവരുന്നതെന്ന് ഷാഫി പറമ്പില്‍ പറഞ്ഞു.
ഇന്ധനവില വര്‍ധനവിനെതിരായി നൂറ് കിലോമീറ്റര്‍ സൈക്കിള്‍ ചവിട്ടിയുളള യൂത്ത് കോണ്‍ഗ്രസിന്റെ പ്രതിഷേധം വലിയ ജനശ്രദ്ധ നേടിയിരുന്നു. എന്നാല്‍ സൈക്കിള്‍ ചവിട്ടുന്നതിനിടെ ഷാഫി പറമ്പില്‍ എംഎല്‍എ സഹപ്രവര്‍ത്തകരോട് തമാശ രൂപേണ പറഞ്ഞ ഡയലോഗുകള്‍ ഇടത് അനുകൂല പേജുകളില്‍ വന്‍ തോതില്‍ ട്രോള്‍ ചെയ്യപ്പെട്ടു.
അപ്പോഴേ പറഞ്ഞില്ലേ പദയാത്ര മതിയെന്ന് എന്ന് ഷാഫി പറമ്പില്‍ പറയുന്നതായാണ് വീഡിയോയില്‍ കാണുന്നത്. സഹപ്രവര്‍ത്തകന്‍ ആരുടെ ഐഡിയയാണെന്ന് ചോദിക്കുമ്പോള്‍ തന്റെതാണെന്ന് കൈകൊണ്ട് ആംഗ്യവും കാണിക്കുന്നുണ്ട്. അതിനിടെ പ്രവര്‍ത്തകന്‍ ലൈവ് പോവുകയാണെന്ന് ഷാഫിയോട് പറയുന്നതും വീഡിയോ ഡിലീറ്റ് ചെയ്യു എന്ന് അദ്ദേഹം തിരിച്ച് പറയുന്നതും വീഡിയോയില്‍ കാണാം.
