തിരുവനന്തപുരം: ചലച്ചിത്രതാരം കെ.ടി.എസ് പടന്നയില്‍ അന്തരിച്ചു. 88 വയസായിരുന്നു. വാര്‍ധക്യസഹജമായ അസുഖങ്ങളെത്തുടര്‍ന്ന് ചികിത്സയിലായിരുന്നു. കടവന്ത്രയിലെ സ്വകാര്യ ആശുപത്രിയില്‍ വച്ച് ഇന്ന് പുലര്‍ച്ചെയായിരുന്നു അന്ത്യം. നാടകത്തില്‍ നിന്നുമാണ് കെ.ടി.എസ് സിനിമാമേഖലയിലെത്തിയത്. ഹാസ്യവേഷങ്ങളിലൂടെ മലയാളികളുടെ മനസ് കവര്‍ന്ന നടനാണ് കെ.ടി.എസ് പടന്നയില്‍ എന്ന കൊച്ചുപറമ്പില്‍ തായ് സുബ്രമണ്യന്‍ പടന്നയില്‍.
പടന്നയില്‍ എഴുതി സംവിധാനം ചെയ്ത വിവാഹദല്ലാള്‍ എന്ന നാടകത്തില്‍ കേന്ദ്രകഥാപാത്രത്തെ അവതരിപ്പിച്ചുകൊണ്ടാണ് കലാലോകത്തേക്കെത്തുന്നത്. രാജസേനന്‍ സംവിധാനം ചെയ്ത അനിയന്‍ ബാവ ചേട്ടന്‍ ബാവ എന്ന ചിത്രത്തിലൂടെയാണ് സിനിമയില്‍ അരങ്ങേറ്റം കുറിക്കുന്നത്.
ശ്രീകൃഷ്ണപുരത്തെ നക്ഷത്രത്തിളക്കം, ആദ്യത്തെ കണ്‍മണി, വൃദ്ധന്മാരെ സൂക്ഷിക്കുക, കാക്കയ്ക്കും പൂച്ചയ്ക്കും കല്യാണം, സ്വപ്‌നലോകത്തെ ബാല ഭാസ്‌കരന്‍, കഥാനായകന്‍, അമര്‍ അക്ബര്‍ അന്തോണി, കുഞ്ഞിരാമായണം, രക്ഷാധികാരി ബൈജു തുടങ്ങി നിരവധി സിനിമകളില്‍ ശ്രദ്ധിക്കപ്പെടുന്ന വേഷങ്ങളില്‍ അഭിനയിച്ചു. സന്മനസുളളവര്‍ക്ക് സമാധാനം, പകിട പകിട പമ്പരം തുടങ്ങിയ ടെലിവിഷന്‍ സീരിയലുകളിലും അഭിനയിച്ചിട്ടുണ്ട്.
