നടന്‍ ടൊവീനോ തോമസിന്റെ 'മിന്നല്‍ മുരളി' ചിത്രീകരണം നിര്‍ത്തിവച്ചു. നാട്ടുകാരുടെ പ്രതിഷേധത്തെത്തുടര്‍ന്നാണ് സിനിമയുടെ ചിത്രീകരണം നിര്‍ത്തിവച്ചത്. തൊടുപുഴയിലെ കുമരമംഗലം പഞ്ചായത്തിലായിരുന്നു സിനിമ ചിത്രീകരിച്ചുകൊണ്ടിരുന്നത് എന്നാല്‍ ഡി. കാറ്റഗറിയിലുളള പഞ്ചായത്തില്‍ കടുത്ത കൊവിഡ് നിയന്ത്രണങ്ങള്‍ നിലനില്‍ക്കെ സിനിമ ചിത്രീകരിച്ചതാണ് നാട്ടുകാരെ പ്രകോപിപ്പിച്ചത്. പൊലീസിന്റെ ഒത്താശയോടെയാണ് സിനിമാ ചിത്രീകരണം നടന്നതെന്നാണ് നാട്ടുകാരുടെ ആരോപണം.
സിനിമാ ഷൂട്ട് ചെയ്യാന്‍ അനുവദിക്കില്ലെന്ന നാട്ടുകാരുടെ കടുത്ത നിലപാടിനെത്തുടര്‍ന്ന് ചിത്രീകരണം നിര്‍ത്തിവച്ചു. സിനിമാ ചിത്രീകരണത്തിന് കലക്ടറുടെ അനുമതിയുണ്ടെന്നായിരുന്നു സിനിമാസംഘം ആദ്യം പറഞ്ഞത് എന്നാല്‍ കലക്ടര്‍ അനുമതി നല്‍കിയിട്ടില്ലെന്ന് വ്യക്തമാക്കിയതോടെ പൊലീസ് ഇടപെട്ട് ചിത്രീകരണം നിര്‍ത്തിവയ്പ്പിക്കുകയായിരുന്നു. അണിയറപ്രവര്‍ത്തകരില്‍ ചിലര്‍ക്കെതിരെ കേസെടുത്തിട്ടുണ്ട്.
ടൊവീനോ തോമസിനെ നായകനാക്കി ബേസില്‍ ജോസഫ് സംവിധാനം ചെയ്യുന്ന രണ്ടാമത്തെ ചിത്രമാണ് മിന്നല്‍ മുരളി. മലയാളം, തമിഴ്, തെലുങ്ക്, കന്നട, ഹിന്ദി എന്നീ ഭാഷകളിലായാണ് ചിത്രം പ്രേക്ഷകര്‍ക്കുമുന്നിലെത്തുക. അജു വര്‍ഗീസ്, ബൈജു, ഫെമിന ജോര്‍ജ്ജ്, ഹരിശ്രീ അശോകന്‍, തമിഴ് താരം ഗുരു സോമസുന്ദരം തുടങ്ങിയവരാണ് ചിത്രത്തിലെ മറ്റുതാരങ്ങള്‍.
