മുംബൈ: നീലച്ചിത്രക്കേസില് അറസ്റ്റിലായ വ്യവസായി രാജ് കുന്ദ്രയുടെ ജാമ്യാപേക്ഷ കോടതി തളളി. മുംബൈ ഹൈക്കോടതിയാണ് രാജ് കുന്ദ്രയുടെ ജാമ്യാപേക്ഷ തളളിയത്. അറസ്റ്റ് ചെയ്യുന്നതിനുമുന്പായി നോട്ടീസ് നല്കിയില്ല എന്ന് ചൂണ്ടിക്കാട്ടിയാണ് രാജ് കുന്ദ്ര കോടതിയെ സമീപിച്ചത്. എന്നാല് രാജ് കുന്ദ്രയെ പൊലീസ് കസ്റ്റഡിയില് വിട്ട മജിസ്ട്രേറ്റ് കോടതിയുടെ ഉത്തരവില് തെറ്റില്ലെന്നും റിമാന്റും തുടര്ന്നുളള ജുഡീഷ്യല് കസ്റ്റഡിയും നിയമാനുസൃതമായിരുന്നുവെന്നും ജസ്റ്റിസ് എ. എസ്. ഗഡ്കരി പറഞ്ഞു.
രാജ് കുന്ദ്രയെ അറസ്റ്റ് ചെയ്യുന്നതിനുമുന്പേ തന്നെ നോട്ടീസ് നല്കിയിരുന്നെന്നും അദ്ദേഹം അത് സ്വീകരിച്ചില്ലെന്നുമാണ് പൊലീസ് പറയുന്നത്. രാജ് കുന്ദ്ര ചോദ്യം ചെയ്യലുമായും അന്വേഷണവുമായും തീരെ സഹകരിക്കുന്നില്ലെന്നും പൊലീസ് പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
നേരത്തെ ജൂലൈ 28-ന് രാജ് കുന്ദ്രയുടെ ജാമ്യാപേക്ഷ മെട്രോപൊളിറ്റന് മജിസ്ട്രേറ്റ് കോടതി തളളിയിരുന്നു. അറസ്റ്റിന്റെ കാരണം അന്വേഷണ ഉദ്യോഗസ്ഥന് രേഖപ്പെടുത്തിയിട്ടുണ്ടെന്നും അറസ്റ്റ് നിയമപരമായിരുന്നുവെന്നും അതുകൊണ്ടുതന്നെ ഇക്കാര്യം ചൂണ്ടിക്കാട്ടി ജാമ്യം നല്കാനാവില്ലെന്നുമായിരുന്നു കോടതിയുടെ പ്രതികരണം.
അശ്ലീല ചിത്രങ്ങള് നിര്മിക്കുകയും അവ ചില ആപ്പുകള് വഴി പ്രചരിപ്പിക്കുകയും ചെയ്തതിന് ഫെബ്രുവരിയിലാണ് മുംബൈ ക്രൈംബ്രാഞ്ച് കേസ് രജിസ്റ്റര് ചെയ്തത്. രാജ് കുന്ദ്രയ്ക്കെതിരെ കൂടുതല് തെളിവുകള് ലഭിച്ചതിനെത്തുടര്ന്നാണ് അറസ്റ്റ് ചെയ്തത്.