ചെന്നൈ: കൊവിഡ് നിയന്ത്രണങ്ങളില് ഇളവ് വരുത്താന് തീരുമാനിച്ച് തമിഴ്നാട് സര്ക്കാര്. കൊവിഡ് പ്രോട്ടോക്കോള് അനുസരിച്ച് സെപ്റ്റംബര് 1 മുതല് ഒമ്പത് മുതല് പത്തുവരെയുള്ള കുട്ടികള്ക്ക് ക്ലാസുകള് പുനരാരംഭിക്കാന് സ്കൂളുകള്ക്ക് അനുമതി നല്കി. ഭക്ഷണ പദ്ധതി പ്രകാരം വിദ്യാര്ത്ഥികള്ക്ക് ഉച്ച ഭക്ഷണം നല്കുവാനും സാധിക്കും. സെപ്റ്റംബർ 15-ന് ശേഷം 1-8 ക്ലാസുകളിലെ ഓഫ്ലൈൻ ക്ലാസുകൾ പുനരാരംഭിക്കുന്നതിനുള്ള തീരുമാനം എടുക്കും.
കോളേജുകള്ക്കും, പോളിടെക്നിക്കിനും സെപ്റ്റംബര് 1 മുതല് തുറന്ന് പ്രവര്ത്തിക്കാം. എന്നാല് ഇത് സംബന്ധിച്ച് സര്ക്കാര് മാര്ഗ്ഗനിര്ദ്ദേശങ്ങള് പുറപ്പെടുവിച്ചിട്ടില്ല. മാര്ഗനിര്ദേശങ്ങള് വന്ന ശേഷമായിരിക്കും അന്തിമ തീരുമാനമുണ്ടാവുക. അധ്യാപകരും ജീവനക്കാരും വാക്സീന് എടുത്തിട്ടുണ്ടെന്ന് ഉറപ്പുവരുത്താന് വിദ്യാഭ്യാസ സ്ഥാപനങ്ങളോട് ആവശ്യപ്പെട്ടിട്ടുണ്ട്.
അതോടൊപ്പം, തിയേറ്ററുകള് തുറന്ന് പ്രവര്ത്തിക്കാനും തീരുമാനമായി. 50 ശതമാനം ആളുകള്ക്കാണ് പ്രവേശനം ഉണ്ടാവുക. തിയേറ്ററുകള് തുറക്കുന്നതിന്റെ ഭാഗമായി ജീവനക്കാര്ക്ക് പ്രതിരോധ കുത്തിവെപ്പുകള് നല്കാനുള്ള തയ്യാറെടുപ്പുകള് പൂര്ത്തിയായതായും അധികൃതര് അറിയിച്ചു.