കോവിഡ്19 രോഗത്തിന്റെ പശ്ചാത്തലത്തിൽ മലേഷ്യയിൽ കുടുങ്ങിയ ഇന്ത്യാക്കാരെ ചെന്നൈയിൽ എത്തിച്ചു. കോലാലംപൂരിലെ വിമാനത്താവളത്തിൽ കുടുങ്ങിയ 104 പേരാണ് ചെന്നൈയിൽ എത്തിയത്. എയർ ഏഷ്യ വിമാനത്തിലാണ് ഇവർ ചെന്നൈയിൽ എത്തിയത്. വിവിധ രാജ്യങ്ങളിൽ നിന്ന് ഇന്ത്യയിലേക്കുള്ള യാത്രക്കിടെയാണ് ഇവരിൽ ഭൂരിഭാഗവും മലേഷ്യയിൽ കുടുങ്ങിയത്. ഇവരെ കൊറോണ വൈറസ് പരിശോധനക്ക് ശേഷം പ്രത്യേക കേന്ദ്രത്തിലേക്ക് മാറ്റും. അസുഖമുളളവരെ പ്രത്യേകം ഐസോലേറ്റ് ചെയ്യും.
ഇതിനിടെ കോവിഡ് ബാധിച്ച് രാജ്യത്ത് ഒരാൾകൂടി മരിച്ചു. ഹിമാചൽ പ്രദേശിൽ ടിബറ്റൻ അഭയാർത്ഥിയാണ് മരിച്ചത്. അമേരിക്കയിൽ നിന്നാണ് ഇയാൾ ഹിമാചലിൽ എത്തിയത്. ഇതോടെ മഹാമാരി മൂലം മരിച്ചവരുടെ എണ്ണം 9 ആയി. വിദേശത്ത് 3 ഇന്ത്യക്കാർ കോവിഡ്19 മൂലം മരിച്ചിട്ടുണ്ട്. ഇന്ത്യയിൽ രോഗം സ്ഥിരീകരിച്ചവരുടെ എണ്ണം 471 ആയി. ഇന്ത്യയിൽ 19817 പേരെയാണ് ഇതിനകം പരിശോധനക്ക് വിധേയമാക്കിയത്.
കോവിഡ് 19 ബാധിച്ച് ലോകത്ത് മരിച്ചവരുടെ ആകെ എണ്ണം 16319 ആയി ഉയർന്നു. ഇറ്റലിയിൽ മരിച്ചവരുടെ എണ്ണം 6077 ആയി. 63977 പേർക്കാണ് ഇതിനകം ഇറ്റലിയിൽ അസുഖ ബാധിതരായത്.