കൊവിഡ്-19 വ്യാപനത്തിന്റെ പശ്ചാത്തലത്തിൽ പ്രതിരോധമാർഗമെന്ന നിലയിൽ സംസ്ഥാന സർക്കാർ നടപ്പാക്കിയ ലോക്ക് ഡൗണിന് പൂർണ പിന്തുണ നൽകുന്നതായി പ്രതിപക്ഷ നേതാവ് രമേശ്‌ ചെന്നിത്തല. ഒരു വര്‍ഷത്തേയ്ക്ക് ജപ്തി നടപടികള്‍ നിര്‍ത്തണമെന്നും വായ്പാ തിരിച്ചടവിനുള്ള മൊറട്ടോറിയം ജനുവരി 31 വരെ കുടിശ്ശിക ഇല്ലാത്തവര്‍ക്ക് മാത്രമായി പരിമിതപ്പെടുത്തരുതെന്നും അദ്ദേഹം ആവശ്യപ്പെട്ടു. 'എപിഎൽ, ബിപിഎൽ വ്യത്യാസമില്ലാതെ സർക്കാർ എല്ലാവരേയും സഹായിക്കണം. എല്ലാ വിഭാഗം തൊഴിലാളികൾക്കും അടിയന്തരമായി ആയിരം രൂപ ലഭ്യമാകുന്ന സംവിധാനം ഉണ്ടാകണം. സർക്കാർ പ്രഖ്യാപിച്ച പാക്കേജ് അടിയന്തരമായി നടപ്പാക്കണം'- ചെന്നിത്തല പറഞ്ഞു.
സോഷ്യൽമീഡിയയിലെ വ്യാജപ്രചാരണങ്ങൾ അവസാനിപ്പിക്കാന്‍ കര്‍ശനമായ നടപടികള്‍ സ്വീകരിക്കണമെന്നും പ്രതിപക്ഷ നേതാവ് ആവശ്യപ്പെട്ടു. നേരത്തെ, ജനങ്ങളുടെ ബുദ്ധിമുട്ട് പരിഹരിക്കാൻ പ്രതിപക്ഷം മുന്നോട്ടുവച്ച നിർദേശം സർക്കാർ അംഗീകരിച്ചതിൽ സന്തോഷമുണ്ടെന്നും അദ്ദേഹം വാര്‍ത്താസമ്മേളനത്തില്‍ പറഞ്ഞു. കൊവിഡ് പ്രതിരോധപ്രവർത്തനങ്ങളിൽ രാഷ്ട്രീയ വേർതിരിവില്ലാതെ, അഭിപ്രായവ്യത്യാസമില്ലാതെ യുഡിഎഫ് ഒപ്പം നിൽക്കുമെന്ന് അദ്ദേഹം സര്‍ക്കാറിന് ഉറപ്പുനല്‍കി.
