കനയ്യ കുമാറും ജിഗ്നേഷ് മേവാനിയും കോണ്ഗ്രസില് ചേര്ന്നത് സ്വാർഥത കൊണ്ടോ അധികാരമോഹം കൊണ്ടോ ആവില്ലെന്ന് അഡ്വ. ഹരീഷ് വാസുദേവന് ശ്രീദേവി. കനയ്യയിൽ, ജിഗ്നേഷിൽ ഈ രാജ്യത്തെ ചെറുപ്പക്കാരെ ഉണർത്താനുള്ള ഊർജ്ജമുണ്ട്, അവർക്കത് കുറച്ചുകൂടി എഫക്ടീവായി ഉപയോഗിച്ച് സംഘപരിവാർ രാഷ്ട്രീയത്തെ എതിർക്കണം എന്നു തോന്നിക്കാണുമെന്നും ഹരീഷ് വിലയിരുത്തുന്നു.
ഹരീഷിന്റെ കുറിപ്പ്:
ലക്ഷ്യം മാർഗ്ഗത്തെ സാധൂകരിക്കും എന്ന രാഷ്ട്രീയ പാഠമാകാം കനയ്യ കുമാറും ജിഗ്നേഷ് മേവാനിയും പഠിച്ചത്. അവരത് പ്രാവർത്തികമാക്കി എന്നു വിശ്വസിക്കാനാണ് എനിക്കിഷ്ടം. CPI യുടെ ഏറ്റവും ഉയർന്ന സമിതിയിൽ ഇത്ര ചെറുപ്പത്തിൽ എത്തിയിട്ടും, കനയ്യയ്ക്ക് തന്റെ മണ്ഡലത്തിൽ കൂടെ നിൽക്കുന്നവരെപ്പോലും നിലനിർത്താനുള്ള സാമ്പതികാവസ്ഥ ഉണ്ടായിരുന്നില്ല എന്നു ഉറ്റസുഹൃത്ത് പറഞ്ഞു കേട്ടിട്ടുണ്ട്. അതിൽ നിരാശനുമായിരുന്നു. ആ ചെറുപ്പക്കാരൻ വെറും സ്വാർഥത കൊണ്ടോ അധികാരമോഹം കൊണ്ടോ പാർട്ടിമാറി എന്നു ഞാൻ കരുതുന്നില്ല. CPI ദേശീയ പാർട്ടിയായി വളരുന്ന സാധ്യതയൊന്നും അതിന്റെ ഇപ്പോഴത്തെ പോക്ക് വെച്ചു മൂപ്പര് കാണുന്നുണ്ടാവില്ല.
കനയ്യയിൽ, ജിഗ്നേഷിൽ ഈ രാജ്യത്തെ ചെറുപ്പക്കാരെ ഉണർത്താനുള്ള ഊർജ്ജമുണ്ട്. അവർക്കത് കുറച്ചുകൂടി എഫക്ടീവായി ഉപയോഗിച്ച് സംഘപരിവാർ രാഷ്ട്രീയത്തെ എതിർക്കണം എന്നു തോന്നിക്കാണും. താൽക്കാലികമായ ശരി കോണ്ഗ്രസ് ആണെന്നും.
ഇതും ആത്യന്തികമായ ശരിയാണെന്ന് തോന്നുന്നില്ല. ഇതുവരെ കനയ്യ വിളിച്ച മുദ്രാവാക്യങ്ങൾ കോണ്ഗ്രസിൽ ഇരുന്ന് ആത്മാർത്ഥമായി വിളിക്കാൻ പറ്റുമെന്നും കരുതുന്നില്ല. പക്ഷെ, തൽക്കാലം അയാൾക്ക് വിശാലമായ ഒരു ക്യാൻവാസ് കിട്ടും. ഈ രാജ്യത്തിനു അതിപ്പോൾ ആവശ്യമാണ് എന്നു ഞാൻ കരുതുന്നു. ഇത്ര പെട്ടെന്ന് നേതാവായി വളർത്തിയ പാർട്ടിക്കും അനുഭാവികൾക്കും ഏറെ സങ്കടവും ചതിവും തോന്നുമെങ്കിൽപ്പോലും.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
