ഡല്ഹി: സോണിയാ ഗാന്ധി കോണ്ഗ്രസ് ഇടക്കാല അധ്യക്ഷയായി തുടരും. നേതൃമാറ്റം വേണമെന്ന ജി 23 നേതാക്കളുടെ ആവശ്യം തല്ക്കാലം അംഗീകരിക്കേണ്ടെന്നാണ് ഹൈക്കമാന്റിന്റെ തീരുമാനം. ഉത്തര്പ്രദേശില് നിയമസഭാ തെരഞ്ഞെടുപ്പ് നടക്കാനിരിക്കെ നേതൃമാറ്റമുണ്ടാവുന്നത് കോണ്ഗ്രസിന് ഗുണകരമായിരിക്കില്ലെന്നും വിമതനേതാക്കളുടെ ആവശ്യത്തിനു വഴങ്ങേണ്ടെന്നുമാണ് കോണ്ഗ്രസിന്റെ തീരുമാനം. കോണ്ഗ്രസ് അധ്യക്ഷനെ തെരഞ്ഞെടുക്കുന്നതു സംബന്ധിച്ച് അന്തിമ തീരുമാനമെടുക്കാന് പ്രവര്ത്തക സമിതി യോഗം ശനിയാഴ്ച്ച ചേരും.
കോണ്ഗ്രസിന് ഒരു മുഴുവന് സമയ പ്രസിഡന്റിനെ വേണമെന്നാണ് ജി 23 നേതാക്കളുടെ ആവശ്യം. ഇക്കാര്യമാവശ്യപ്പെട്ട് ജി 23 നേതാക്കളിലൊരാളായ ഗുലാം നബി ആസാദ് സോണിയാ ഗാന്ധിക്ക് കത്തയച്ചിരുന്നു. അതിന്റെ അടിസ്ഥാനത്തിലാണ് കോണ്ഗ്രസ് പ്രവര്ത്തക സമിതി യോഗം വിളിച്ചിരിക്കുന്നത്. സംഘടനാ തെരഞ്ഞെടുപ്പ് നടത്താനുളള ഏകദേശ തിയതിയും യോഗത്തില് തീരുമാനിച്ചേക്കും.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യു
കഴിഞ്ഞ പാര്ലമെന്റ് തെരഞ്ഞെടുപ്പിലെ തോല്വിയെത്തുടര്ന്ന് രാഹുല് ഗാന്ധി കോണ്ഗ്രസ് അധ്യക്ഷസ്ഥാനം രാജി വെച്ചിരുന്നു. അതിനെത്തുടര്ന്നാണ് സോണിയാ ഗാന്ധി ഇടക്കാല അധ്യക്ഷയായി ചുമതലയേറ്റത്. പിന്നീട് രാഹുല് ഗാന്ധിയെ തിരികെ കൊണ്ടുവരണമെന്ന തരത്തില് ആവശ്യങ്ങളുയര്ന്നുവന്നിരുന്നുവെങ്കിലും നിലവില് രാഹുലിന് സ്വീകാര്യത കുറഞ്ഞു. പകരം പ്രിയങ്കയെ അധ്യക്ഷയാക്കണമെന്നാണ് ഒരു വിഭാഗം കോണ്ഗ്രസ് നേതാക്കളുടെ ആവശ്യം.
