നാടും നഗരവും നിശ്ചലയമായതിനെ തുടർന്ന് പട്ടിണിയിലായ തെരുവ് പട്ടികൾക്ക് ഭക്ഷണം നൽകി കോഴിക്കോട്ടെ പൊലീസ്. നഗരത്തിൽ അലയുന്ന പട്ടികൾക്ക് പൊലീസിന്റെ നേതൃത്വത്തിൽ ഭക്ഷണം എത്തിച്ചു കൊടുത്തു. സിറ്റി പൊലീസ് കമ്മീഷണർ എ വി ജോർജിന്റെ നേതൃത്വത്തിലാണ് പൊലീസുകാർ ഭക്ഷണം നൽകിയത്. പൊലീസ് തന്നെയാണ് ഇവക്ക് വേണ്ട ആഹാരം പാകം ചെയ്തത്. തെരുവ് നായ്ക്കള്‍ക്കും കുരങ്ങുകള്‍ക്കും ഭക്ഷണം എത്തിച്ചു നല്‍കണമെന്ന മുഖ്യമന്ത്രിയുടെ നിര്‍ദേശം ഏറ്റെടുത്താണ് പൊലീസിന്റെ നടപടി.
ലോക്ക് ഡൗണ്‍ മൂലം വളര്‍ത്തു മൃഗങ്ങളുടെ ഭക്ഷ്യവസ്തുകള്‍ക്ക് ക്ഷാമമുണ്ടാവില്ലെന്ന് ഉറപ്പാക്കുമെന്ന് ഇന്നലെ മുഖ്യമന്ത്രി അറിയിച്ചിരുന്നു. ജനങ്ങള്‍ വീടുകളില്‍ കഴിയുന്ന സാഹചര്യത്തില്‍ തെരുവ് നായ്ക്കള്‍ക്ക് ഭക്ഷണം എത്തിച്ചില്ലെങ്കിൽ അവ അക്രമാസക്തമാകാൻ സാധ്യയുണ്ട്. . തെരുവ് പട്ടികൾക്ക് തദ്ദേശസ്വയംഭരണസ്ഥാപനങ്ങള്‍ ഭക്ഷണം എത്തിച്ചു നല്‍കണമെന്നും മുഖ്യമന്ത്രി ആവശ്യപ്പെട്ടിരുന്നു. വിവിധ കാവുകളിലെ കുരങ്ങുകള്‍ക്കും ഭക്ഷണം എത്തിക്കാനും സര്‍ക്കാര്‍ നിര്‍ദേശം നല്‍കിയിട്ടുണ്ട്.
