ചണ്ഡീഗഡ്: വൈക്കോല് കത്തിച്ചതിന്റെ പേരില് കര്ഷകര്ക്കെതിരെ ചുമത്തിയ കേസുകള് പിന്വലിച്ച് പഞ്ചാബ് മുഖ്യമന്ത്രി ചരണ്ജിത് സിംഗ് ചന്നി. കാര്ഷിക നിയമങ്ങള്ക്കെതിരെ പ്രതിഷേധിച്ച കര്ഷകര്ക്കെതിരെ ചുമത്തിയ കേസുകളും സര്ക്കാര് പിന്വലിക്കുമെന്ന് മുഖ്യമന്ത്രി പറഞ്ഞു. കര്ഷക സംഘടനാ പ്രതിനിധികളുമായി നടത്തിയ ചര്ച്ചക്കുശേഷമായിരുന്നു മുഖ്യമന്ത്രിയുടെ പ്രഖ്യാപനം.
'കര്ഷകര് വൈക്കോല് കത്തിക്കരുതെന്നാണ് സര്ക്കാര് ആഗ്രഹിക്കുന്നത്. ഞങ്ങള് അതിനായി പ്രവര്ത്തിക്കും. വൈക്കോല് കത്തിച്ചതിന്റെ പേരില് കര്ഷകര്ക്കെതിരെ പൊലീസ് ഇതുവരെ ചുമത്തിയ കേസുകള് പിന്വലിക്കുകയാണ്. ഇനിമുതല് വൈക്കോലും മറ്റ് അവശിഷ്ടങ്ങളും കത്തിക്കരുതെന്ന് കര്ഷകരോട് അഭ്യര്ത്ഥിക്കുന്നു. വൈക്കോല് കത്തിക്കുന്നത് വലിയ മലിനീകരണത്തിന് കാരണമാവുന്നുണ്ട്. അത് മനുഷ്യന്റെ ആരോഗ്യത്തെയും മണ്ണിന്റെ ഫലഭൂയിഷ്ടതയെയുമെല്ലാം ബാധിക്കും.' പഞ്ചാബ് മുഖ്യമന്ത്രി പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
ഡല്ഹിയിലും പരിസരപ്രദേശങ്ങളിലുമുണ്ടാവുന്ന വായുമലിനീകരണത്തിന് കര്ഷകര് വൈക്കോലും മറ്റ് അവശിഷ്ടങ്ങളും കത്തിക്കുന്നതും ഒരു കാരണമാണ് എന്ന തരത്തില് റിപ്പോര്ട്ടുകളുണ്ടായിരുന്നു. വായുമലിനീകരണ തോത് വര്ധിച്ച പശ്ചാത്തലത്തില് ഡല്ഹിയിലെ സ്കൂളുകളും കോളേജുകളും അടച്ചിട്ടിരിക്കുകയാണ്. ഡല്ഹിയുടെ മുന്നൂറ് കിലോമീറ്റര് ചുറ്റളവില് പ്രവര്ത്തിക്കുന്ന താപവൈദ്യുത നിലയങ്ങളും കല്ക്കരിയില് പ്രവര്ത്തിക്കുന്ന പവര് പ്ലാന്റുകളും അടക്കുമെന്ന് ഡല്ഹി സര്ക്കാര് നേരത്തെ വ്യക്തമാക്കിയിരുന്നു.
