തിരുവനന്തപുരം: നിയമസഭാ കയ്യാങ്കളിക്കേസില് ഇന്ന് നടത്താനിരുന്ന വിചാരണ അടുത്ത മാസം 22-ലേക്ക് മാറ്റി. തിരുവനന്തപുരം സി ജെ എം കോടതിയാണ് കേസ് മാറ്റിയത്. മന്ത്രി വി ശിവന്കുട്ടിയടക്കമുള്ള 6 പ്രതികളുടെ വിടുതല് ഹര്ജി തള്ളിയ കോടതി എല്ലാ പ്രതികളോടും ഇന്ന് ഹാജരാകുവാന് നിര്ദ്ദേശവും നല്കിയിരുന്നു. എന്നാല് ഇന്ന് സിറ്റിംഗ് ഇല്ലാത്തതിനെ തുടര്ന്നാണ് കേസ് മാറ്റിയത്. അതേസമയം, നിയമസഭാ കയ്യാങ്കളി കേസിൽ റിവ്യൂ ഹർജിയുമായി മന്ത്രിയടക്കമുള്ള പ്രതികള് ഹൈക്കോടതിയെ സമീപിച്ചിരിക്കുകയാണ്. കയ്യാങ്കളി കേസ് റദ്ദാക്കണമെന്ന ആവശ്യം തള്ളിയതിനെതിരെയാണ് റിവ്യൂ ഹർജി.
നിയമസഭാ കൈയ്യാങ്കളിക്കേസില് കുറ്റക്കാരെല്ലാവരും വിചാരണനേരിടണമെന്ന് സുപ്രീം കോടതി നേരത്തെ വിധിച്ചിരുന്നു. ഇത്തരം പ്രവര്ത്തികള് അംഗീകരിക്കാന് സാധിക്കില്ലെന്നും കോടതി പറഞ്ഞു. നിയമസഭാ കയ്യാങ്കളി കേസില് സര്ക്കാരിന്റെ ഹര്ജി തള്ളിയതിന് ശേഷമാണ് കോടതിയുടെ വിധി. പൊതുമുതല് നശിപ്പിക്കുന്നത് അഭിപ്രായ സ്വാതന്ത്ര്യമല്ലെന്നും കോടതി നിരീക്ഷിച്ചിരുന്നു. ജസ്റ്റിസ് ഡി വൈ ചന്ദ്രചൂഢ്, എം ആർ ഷാ എന്നിവർ ഉൾപ്പെട്ട ഡിവിഷൻ ബഞ്ചിന്റേതായിരുന്നു സുപ്രധാന വിധി. കേസ് പിൻവലിക്കുന്നത് ക്രിമിനൽ നിയമത്തിൽ നിന്ന് പ്രതികൾക്ക് ഇളവു നൽകാൻ ഇട വരുത്തുമെന്നും, സംസ്ഥാന നിയമസഭയിൽ പൊതുജനം അർപ്പിച്ച വിശ്വാസം കാത്തുസൂക്ഷിക്കേണ്ടതുണ്ടെന്നും സുപ്രീംകോടതി വ്യക്തമാക്കിയിരുന്നു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
2015 മാർച്ച് 13- ന് ബാർ കോഴ വിവാദത്തിന്റെ ഭാഗമായി മുന് ധനമന്ത്രി കെ എം മാണിയുടെ ബജറ്റ് അവതരണം തടസ്സപ്പെടുത്താനാണ് നിയമസഭയിൽ അന്നത്തെ പ്രതിപക്ഷമായിരുന്ന എല് ഡി എഫ് എം എൽ എമാർ നടുക്കളത്തിലിറങ്ങി പ്രതിഷേധിച്ചത്. സംഭവത്തില് നിയമസഭയിലെ കമ്പ്യൂട്ടര്, കസേരകള്, സ്പീക്കറുടെ ചേംബര് അടക്കമുള്ളവക്ക് നാശനഷ്ടം സംഭവിച്ചിരുന്നു. കേസ് പിന്വലിക്കണമെന്ന് ആവശ്യപ്പെട്ട് സര്ക്കാര് നല്കിയ ഹര്ജി ഹൈക്കോടതി തള്ളിയതിനാലാണ് കേരള സര്ക്കാര് സുപ്രീംകോടതിയെ സമീപിച്ചത്.
