തിരുവനന്തപുരം: കൊവിഡ് പ്രതിരോധ നടപടികളുമായി സഹകരിക്കാത്തവര്ക്ക് ഇനിമുതല് സൗജന്യ ചികിത്സ നല്കില്ലെന്ന് മുഖ്യമന്ത്രി പിണറായി വിജയന്. കൊവിഡ് അവലോകന യോഗത്തിലാണ് മുഖ്യമന്ത്രി ഇക്കാര്യം വ്യക്തമാക്കിയത്. വാക്സിന് സ്വീകരിക്കാതെ കൊവിഡ് പോസിറ്റീവാകുന്നവരുടെ ചികിത്സാ ചെലവ് സര്ക്കാര് വഹിക്കില്ലെന്നും മറ്റ് രോഗങ്ങളോ അലര്ജിയോ മൂലം വാക്സിന് സ്വീകരിക്കാത്തതാണെങ്കില് ഡോക്ടറുടെ സര്ട്ടിഫിക്കറ്റ് ഹാജരാക്കണമെന്നും മുഖ്യമന്ത്രി പറഞ്ഞു.
'വാക്സിന് സ്വീകരിക്കാത്ത അധ്യാപകരും സ്കൂള് ജീവനക്കാരും ശാരീരിക പ്രശ്നങ്ങളോ അലര്ജിയോ ഉളളതിന്റെ സര്ട്ടിഫിക്കറ്റ് ഹാജരാക്കണം. അല്ലാത്തവര് വാക്സിന് സ്വീകരിച്ച് സര്ട്ടിഫിക്കറ്റ് ഹാജരാക്കുകയോ ആഴ്ച്ചതോറും സ്വന്തം ചിലവില് ആര്ടിപിസിആര് പരിശോധന നടത്തി ഫലം സമര്പ്പിക്കുകയോ ചെയ്യണം. സ്കൂളുകളിലും കോളേജുകളിലും പോകുന്ന വിദ്യാര്ത്ഥികളുടെ സുരക്ഷിതത്വം കണക്കിലെടുത്താണിത്' മുഖ്യമന്ത്രി പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
ഒമൈക്രോണ് വകഭേദത്തിന്റെ പശ്ചാത്തലത്തില് ജാഗ്രത ശക്തിപ്പെടുത്താന് നിര്ദേശം നല്കിയിട്ടുണ്ടെന്ന് മുഖ്യമന്ത്രി പറഞ്ഞു. വിദേശത്തുനിന്ന് വിമാനത്താവളത്തിലെത്തുന്നവരുടെ യാത്രാചരിത്രം കര്ശനമായി പരിശോധിക്കണമെന്നും പ്രോട്ടോക്കോളുകള് പാലിക്കുമ്പോള് വീഴ്ച്ചയുണ്ടാവരുതെന്നും മുഖ്യമന്ത്രി നിര്ദേശിച്ചു. രണ്ടാം ഡോസ് വാക്സിന് സ്വീകരിക്കാത്തവര്ക്കായി ഡിസംബര് 1 മുതല് 15 വരെ പ്രത്യേക വാക്സിനേഷന് യജ്ഞം സംഘടിപ്പിക്കാന് ആരോഗ്യവകുപ്പിന് നിര്ദേശം നല്കിയിട്ടുണ്ട്.