കൊച്ചിയില് നടിയെ ആക്രമിച്ച കേസില് നടന് ദിലീപിനെതിരെ ഗുരുതര ആരോപണങ്ങളുമായി ദിലീപിന്റെ മുന് സുഹൃത്ത് സംവിധായകന് ബാലചന്ദ്രകുമാര്. നടിയെ ആക്രമിച്ചതിന്റെ ദൃശ്യങ്ങള് ദിലീപിന് ജാമ്യത്തിലിറങ്ങിയപ്പോള് തന്നെ ലഭിച്ചെന്നും ഇതിന് താന് സാക്ഷിയാണെന്നും അദ്ദേഹം പറയുന്നു. ദിലീപ് ജാമ്യത്തിലിറങ്ങി 40 ദിവസത്തിനുള്ളില് നടിയെ ആക്രമിച്ച ദൃശ്യങ്ങള് ദിലീപിന്റെ വീട്ടില് ഒരു വിഐപി എത്തിച്ചു. ദിലീപും ദിലീപിന്റെ സഹോദരന് അനൂപും സഹോദരിയുടെ ഭര്ത്താവ് സുരാജും ഉള്പ്പെടെയുള്ളവര് അത് കാണുന്നതിന് താന് സാക്ഷിയായി. പൊലീസിന്റെ കൈവശമുണ്ടായിരുന്ന ദൃശ്യങ്ങളുടെ പകര്പ്പായിരുന്നു ഇത്. ഏതാണ്ട് ഏഴിലേറെ ക്ലിപ്പുകള് അടങ്ങുന്നതാണ് ഈ ദൃശ്യങ്ങളെന്നും ബാലചന്ദ്രകുമാര് പറഞ്ഞു. റിപ്പോര്ട്ടര് ടി. വിയോട് സംസാരിക്കുകയായിരുന്നു അദ്ദേഹം.
ബാലചന്ദ്രകുമാര് പറയുന്നത്:
പള്സര് സുനിയും ദിലീപും തമ്മില് അടുത്ത ബന്ധമുണ്ടെന്ന് അനൂപാണ് പറഞ്ഞത്. പിന്നീട് അത് നേരിട്ട് ബോധ്യപ്പെടുകയും ചെയ്തതാണ്. നടി ആക്രമിക്കപ്പെട്ട സംഭവം നടന്നപ്പോള് പ്രതിയെന്ന് പറഞ്ഞ് പുറത്തു വന്ന പള്സര് സുനിയുടെ ചിത്രം കണ്ടപ്പോള് തന്നെ ദീലിപിനെ വിളിച്ചു. സാറിന്റെ വീട്ടില് കണ്ട പയ്യനല്ലേ പിടിയിലായത് എന്ന് ചോദിച്ചു. ഏത് പയ്യനെന്നാണ് ദിലീപ് തിരിച്ചു ചോദിച്ചത്. ബാലുവിന് തെറ്റിയതായിരിക്കുമെന്ന് പറഞ്ഞു.
പിന്നീട് ബാലു തന്റെ കൂടെ പള്സര് സുനിയെ കണ്ട കാര്യം പുറത്തു പറയരുതെന്ന് ദിലീപ് ആവശ്യപ്പെട്ടു. കേസില് ദിലീപ് റിമാന്ഡിലായിരിക്കെ ഒരിക്കല് സഹോദരന് മുഖേന ആലുവയിലെ ജയിലിലേക്ക് തന്നെ വിളിപ്പിച്ച് ഇക്കാര്യം വീണ്ടും ആവശ്യപ്പെട്ടു. പിന്നീട് ദിലീപും ബന്ധുക്കളും തന്നോട് വലിയ സ്നേഹമാണ് കാണിച്ചത്. അനൂപ് എന്നെ നിരന്തരം വിളിച്ചു കൊണ്ടിരുന്നു. സുരാജ് എന്ന ദിലീപിന്റെ സഹോദരീ ഭര്ത്താവ് വിളിച്ചു, അനിയത്തി സബിതയുടെ ഭര്ത്താവ് വിളിച്ചു, കാവ്യയും നിരന്തരം വിളിച്ചു. ജാമ്യം ലഭിക്കുന്നത് വരെ പള്സര് സുനിയെ വീട്ടില് ദിലീപിനൊപ്പം കണ്ട കാര്യം പറയരുതെന്നാണ് ഇവരെല്ലാവരും ആവശ്യപ്പെട്ടത്.
കാവ്യ ഒരുപാട് തവണ വിളിച്ചിട്ടുണ്ട്. ഞാന് ജയിലില് പോയി കാണുന്ന ദിവസം ആഹാരം കഴിച്ചില്ലെന്നാണ് കാവ്യ പറഞ്ഞത്. ബാലുവിന്റെ ഭാഗത്ത് നിന്ന് ഒരു ക്ലാരിറ്റി കിട്ടുന്നത് വരെ ഞാന് ആഹാരം കഴിക്കില്ലെന്നാണ് കാവ്യ പറഞ്ഞത്. ഈ കാര്യങ്ങള് മുഴുവന് ചൂണ്ടിക്കാണിച്ച് ശബ്ദസന്ദേശമുള്പ്പെടെയുള്ള തെളിവുകള് ഉള്പ്പെടുത്തി ഏതാണ്ട് 30 ലേറെ പേജുള്ള പരാതി ബാലചന്ദ്രകുമാര് മുഖ്യമന്ത്രിക്ക് കൈമാറിയിട്ടുണ്ട്. കേസില് പ്രതിയായ ദിലീപിനെ സഹായിച്ചതിലുള്ള കുറ്റബോധവും തന്റെ ജീവന് ഭീഷണിയുള്ളതിനാലുമാണ് ഇപ്പോള് ഇക്കാര്യം തുറന്നു പറഞ്ഞതെന്നും ബാലചന്ദ്രകുമാര് പറയുന്നു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക