കോഴിക്കോട്: തനിക്ക് വധഭീഷണിയുണ്ടെന്ന് വെളിപ്പെടുത്തി സമസ്ത പ്രസിഡന്റ് ജിഫ്രി മുത്തുക്കോയ തങ്ങള്. ദുരൂഹ സാഹചര്യത്തില് കൊല്ലപ്പെട്ട കാസര്ഗോഡ് ചെമ്പരിക്ക ഖാസി സി എം അബ്ദുല്ല മുസലിയാരുടെ ഗതിയുണ്ടാവുമെന്ന് മുന്നറിയിപ്പ് നല്കിയുളള കോളുകള് തനിക്ക് വരുന്നുണ്ടെന്നും അതുകൊണ്ടൊന്നും പുറകോട്ടുപോകില്ലെന്നും ജിഫ്രി മുത്തുക്കോയ തങ്ങള് പറഞ്ഞു. മലപ്പുറം ആനക്കയത്ത് നടന്ന പരിപാടിയില് സംസാരിക്കവേയാണ് അദ്ദേഹം വധഭീഷണിയുടെ കാര്യം വെളിപ്പെടുത്തിയത്.
'ഒരു പ്രസ്ഥാനവുമായി മുന്നോട്ടുപോകുമ്പോള് വലിയ പ്രയാസങ്ങളുണ്ടാകും. സിപിഎമ്മിന്റെ അനുഭവമുണ്ടാകും. ചെമ്പരിക്ക ഖാസിയുടെ ഗതിയുണ്ടാകും എന്നൊക്കെ പല വിവരമില്ലാത്തവരും വിളിച്ച് പറയുന്നുണ്ട്. അങ്ങനെ എനിക്ക് വല്ലതും സംഭവിച്ചാല് എനിക്കെതിരെ എഴുതുന്നവരെ ആദ്യം പിടിച്ചാല് മതി. ഇതൊന്നുംകൊണ്ട് ഞാന് പിന്നോട്ടുപോവില്ല. അങ്ങനെയാണ് മരിക്കേണ്ടതെങ്കില് അങ്ങനെ തന്നെ സംഭവിക്കും. അല്ലാഹു നല്ല നിലക്ക് ഈമാനോടെ മരിക്കാന് തൗഫീക്ക് നല്കട്ടേ' എന്നാണ് ജിഫ്രി മുത്തുക്കോയ തങ്ങള് പറഞ്ഞത്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
വഖഫ് ബോര്ഡ് പി എസ് സിക്ക് വിടുന്നതുമായി ബന്ധപ്പെട്ട വിവാദത്തില് മുസ്ലീം ലീഗിന്റെ നിലപാടിന് വിരുദ്ധമായി സംസാരിച്ചതിനുപിന്നാലെ മുത്തുക്കോയ തങ്ങള്ക്കെതിരെ സൈബര് ആക്രമണം നടന്നിരുന്നു. പിണറായി വിജയനുമായി ചര്ച്ച നടത്തിയെന്നും സര്ക്കാരില് വിശ്വാസമുണ്ടെന്നുമാണ് ജിഫ്രി മുത്തുക്കോയ തങ്ങള് പറഞ്ഞത്.
