രണ്ടേകാല്‍ നൂറ്റാണ്ടിനിപ്പുറവും ഗാലിബ് നിത്യസാന്നിദ്ധ്യമാകുന്നു- കെ പി എ സമദ്

മീർസാഗാലിബിന്  രണ്ടു പരിചാരകരാണുണ്ടായിരുന്നത്. ഒന്ന് വഫാദർ. അവർ അടുക്കളയിൽ ഗാലിബിന്റെ ഭാര്യ ഉംറാവിനെ സഹായിച്ചു. മറ്റൊന്ന്  കല്ലുമിയ. അദ്ദേഹം ഗാലിബിന്റെ സ്വന്തം പരിചാരകനായിരുന്നു. എന്നാൽ, മൂന്നുപേരുണ്ടായിരുന്നു എന്ന് ഗുൽസാർ ശഠിക്കുന്നു. മൂന്നാമനെക്കുറിച്ച് പക്ഷേ, ഒരു രേഖയിലും പരാമർശമില്ല. ഗാലിബിനാണെങ്കിൽ ദൈനംദിന കാര്യങ്ങൾ കുറിച്ചുവെക്കുന്ന സ്വഭാവമുണ്ടായിരുന്നു. അവയെല്ലാം ഇന്ന് ചരിത്ര രേഖകളാണ്. അവയിലൊന്നും മൂന്നാമനെക്കുറിച്ച് പറയുന്നില്ല.

അത് ശ്രദ്ധയിൽപ്പെടുത്തുമ്പോൾ ഗുൽസാർ നറുപുഞ്ചിരിയോടെ, തന്റെ കനത്ത, മുഴക്കമുള്ള, മ്യൂസിക്കലായ ശബ്ദത്തിൽ പറയും- "തീസ് രാ മൈ ഹും." (മൂന്നാമൻ ഞാനാണ്.)

അതൊരു വെറും പ്രസ്താവമായിരുന്നില്ല. അത്രമേൽ ഗാലിബ് ഗുൽസാറിനെ സ്വാധീനിച്ചിരുന്നു. അതിന്റെ സാക്ഷ്യപത്രമാണ് ഗുൽസാറിന്റെ 'മീർസാ ഗാലിബ്' എന്ന ടി വി സീരിയൽ. കവിയും ഗാനരചയിതാവും സംഭാഷണ രചയിതാവും തിരക്കഥാകാരനും ചലച്ചിത്രകാരനുമൊക്കെയായി കാലാതിവർത്തിയായ സംഭാവനകൾ ഗുൽസാറിന്റെതായുണ്ട്. എന്നാൽ അവയെക്കാളേറെ ഗുൽസാറും ആരാധകരും വിലമതിക്കുന്നത് ഗാലിബിനെക്കുറിച്ചുള്ള ടി വി സീരിയലാണ്.  പുതിയകാലത്തെ യുവതയ്ക്ക് ഗാലിബ് എന്ന കവിയേയും വ്യക്തിയേയും സമഗ്രമായി പരിചയപ്പെടുത്തുന്ന ദൗത്യമാണ് ഗുൽസാർ സീരിയലിലൂടെ സാക്ഷാൽക്കരിച്ചത്. 

1988 ൽ ദൂരദർശൻ പ്രക്ഷേപണം ചെയ്ത ഈ സീരിയൽ 45 മിനുട്ട് ദൈർഘ്യമുള്ള 17 എപിസോഡുകളിലാണ് പൂർത്തിയാകുന്നത്. കൾട്ട് ക്ലാസിക്കായി മാറിയ ഈ ടി.വി. സീരിയലിലൂടെ ഗുൽസാർ മീർസാ ഗാലിബിനു മാത്രമല്ല പുനർജന്മം നൽകിയത്. ഗാലിബിന്റെ വേഷം ചെയ്ത നസീറുദ്ദീൻഷാക്കും സീരിയലിന് സംഗീതം നൽകിയ ജഗ്ജീത് സിംഗിനും അത് അവരവരുടെ മേഖലകളിലെ പുനർജന്മം തന്നെയായിരുന്നു. അനുഭവങ്ങളുടെയും അംഗീകാരത്തിന്റെയും അതിരുകളില്ലാത്ത ലോകമാണ് അതവർക്കുമുമ്പിൽ തുറന്നു കൊടുത്തത്.

1797 ഡിസംബർ 27നാണ്  ഗാലിബ് ജനിക്കുന്നത്. 224 വർഷങ്ങൾക്കിപ്പുറത്തും ഗാലിബ് നമ്മുടെയെല്ലാം മനസ്സുകളിലെ നിത്യസാന്നിദ്ധ്യമായി നിലകൊള്ളുന്നുവെങ്കിൽ  അതിനു നാം കടപ്പെട്ടിരിക്കുന്നത് ഈ അതുല്യ പ്രതിഭകളോടാണ്. 

സിസംബർ മാംസം വിട പറയുന്ന ഈ സംക്രമവേളയിൽ ആ വലിയ കലാകാരന്മാരോടുള്ള ആദരസൂചകമായി സീരിയലിൽ നിന്നുള്ള ഒരു ഗസൽ ഇവിടെ അവതരിപ്പിക്കുന്നു. 

യെ ന ഥി ഹമാരി കിസ്മത്

കെ വിസാൽ-എ-യാർ ഹോതാ

അഗർ ഔർ ജീതെ രഹ്തെ

യഹി ഇൻതിസാർ ഹോതാ

(ഓമലാളുമായൊന്നിക്കാമെന്നത് 

ഉണ്ടായിരുന്നില്ല വിധിയിലെന്റെ

ഇനിയും ജീവിതമുണ്ടെങ്കിൽ അന്നും ഞാൻ

തുടരും അവൾക്കായി കാത്തിരിപ്പ്)

തേരെ വാദെ പർ ജിയെ ഹം

തൊ യെ ജാൻ, ഝൂഠ് ജാനാ

കെ ഖുഷി സെ മർ ന ജാതെ

അഗർ ഏത്ബാർ ഹോതാ!

 (നീ തന്ന വാക്കിൽ ജീവിതമർപ്പിച്ചു

 പൊളിയാണ് വാക്കെന്നറിഞ്ഞുതന്നെ

 വിശ്വസിച്ചിരുന്നു നിൻ വാഗ്ദാനമെങ്കിൽ 

 മരിക്കില്ലേ ഞാനന്നേയാനന്ദത്താൽ!!)

കോയി മേരെ ദിൽ സെ പൂഛേ

തേരെ തീർ-എ-നീം കശ് കൊ

യെ ഖലിഷ് കഹാം സെ ഹോതി

ജൊ ജിഗർ കെ പാർ ഹോതാ

(പാതികുലച്ച നിന്നമ്പുകൊണ്ടാൽ

എന്തെന്നീ ഹൃദയത്തോടാരാഞ്ഞെങ്കിൽ!

കരളു പിളർന്ന് കടന്നെന്നാലും

കാണുമോ ഇത്ര കടുത്ത നീറ്റൽ!)

കഹൂം കിസ്‌ സെ മൈ കി ക്യാ ഹൈ

ശബ്-എ-ഗം ബുരി ബലാ ഹൈ

മുഝെ ക്യാ ബുരാ ഥാ മർനാ

അഗർ ഏക് ബാർ ഹോതാ

(വിരഹരാവിന്റെ പീഡനങ്ങൾ

 എവ്വിധമെന്നു ഞാനെന്തു ചൊല്ലാൻ!

 മരണമാണെന്നും അതിലും ഭേദം

 വരുകയില്ലല്ലോ അത് വീണ്ടും വീണ്ടും!)

മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും  ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക