നടിയെ ആക്രമിച്ച സംഭവത്തില് നീതി നടപ്പാക്കണമെന്ന് മുഖ്യമന്ത്രിയോട് ആവശ്യപ്പെട്ട് വുമണ് ഇന് സിനിമ കളക്ടീവ്. നീതിക്കുവേണ്ടിയുളള പോരാട്ടത്തില് അഞ്ചുവര്ഷം പിന്നിടുമ്പോള് സമഗ്രമായ അന്വേഷണവും തൃപ്തികരമായ വിചാരണയും ഉറപ്പാക്കുന്ന ഇടപെടലാണ് മുഖ്യമന്ത്രിയുടെ ഭാഗത്തുനിന്ന് ആക്രമിക്കപ്പെട്ട നടി ആവശ്യപ്പെട്ടിരിക്കുന്നതെന്ന് ഡബ്ല്യു സി സി പറഞ്ഞു. അതിജീവിച്ച വ്യക്തിക്കൊപ്പം നിന്നുകൊണ്ട് നീതി നടപ്പാക്കുന്നുണ്ടെന്ന് ഉറപ്പുവരുത്താന് ഗവണ്മെന്റിനോടും മുഖ്യമന്ത്രിയോടും ആവശ്യപ്പെടുകയാണെന്നും ഡബ്ല്യു സി സി പുറത്തിറക്കിയ ഫേസ്ബുക്ക് കുറിപ്പില് പറയുന്നു. സ്റ്റാന്ഡ് വിത്ത് സര്വൈവര്, അവള്ക്കൊപ്പം എന്നീ ഹാഷ്ടാഗുകളോടൊപ്പമാണ് ഡബ്ല്യു സി സിയുടെ പ്രസ്താവന.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
ഇന്നലെ നടന് ദിലീപിനെതിരെ തുടരന്വേഷണം ആവശ്യപ്പെട്ട് മുഖ്യമന്ത്രി പിണറായി വിജയന് നടി കത്ത് നല്കിയിരുന്നു. സംവിധായകന് ബാലചന്ദ്രകുമാറിന്റെ വെളിപ്പെടുത്തലില് അന്വേഷണം വേണമെന്നും രണ്ടാമത്തെ പബ്ലിക്ക് പ്രോസിക്യൂട്ടറും കേസില് നിന്ന് പിന്മാറിയതില് ആശങ്കയുണ്ടെന്നുമാണ് നടി കത്തില് വ്യക്തമാക്കിയിരിക്കുന്നത്. കേസിലെ മുഖ്യപ്രതി പള്സര് സുനിയുമായി ദിലീപിന് ബന്ധമുണ്ടെന്ന് ബാലചന്ദ്രകുമാര് ആരോപിച്ചിരുന്നു. നടിയെ ആക്രമിച്ചതിന്റെ ദൃശ്യങ്ങള് ദിലീപിന് ജാമ്യത്തിലിറങ്ങിയപ്പോള് തന്നെ ലഭിച്ചിരുന്നു. പൊലീസിന്റെ കൈവശമുണ്ടായിരുന്ന ദൃശ്യങ്ങളുടെ പകര്പ്പായിരുന്നു ഇത്. ഏതാണ്ട് ഏഴിലേറെ ക്ലിപ്പുകള് അടങ്ങുന്നതാണ് ഈ ദൃശ്യങ്ങളെന്നുമായിരുന്നു ബാലചന്ദ്രകുമാറിന്റെ വെളിപ്പെടുത്തല്.
