സംസ്ഥാന സർക്കാർ പ്രഖ്യാപിച്ച സൗജന്യ റേഷൻ വിതരണം ആരംഭിച്ചു. ലോക്ഡൗൺ നിർദ്ദേശങ്ങൾക്ക് വിധേയമായിട്ടാണ് റേഷൻ വിതരണം ചെയ്യുന്നത്. ഒരേ സമയം 5 പേരെ മാത്രമെ റേഷന്‍ കടയിൽ അനുവദിക്കുന്നുള്ളു. പലയിടത്തും ടോക്കൺ സമ്പ്രദായം ഏർപ്പെടുത്തിയിട്ടുണ്ട്. മുൻഗണനാ പട്ടികയിൽ ഉള്ളവർക്കാണ് രാവിലെ റേഷന്‍ വിതരണം ചെയ്യുന്നത്. മുൻഗണന ഇതര വിഭാഗത്തിന് ഉച്ചക്ക് ശേഷം വിതരണം ചെയ്യും. ഏപ്രിൽ 20ന് മുമ്പ് സൗജന്യ റേഷന്‍ വിതരണം പൂർത്തിയാക്കും. അതിനു ശേഷമായിരിക്കും കേന്ദ്രം പ്രഖ്യാപിച്ച അരി വിതരണം ചെയ്യുക.
റേഷന്‍ കാര്‍ഡ് ഇല്ലാത്തവര്‍ക്കും സൗജന്യ അരിയും കിറ്റും ലഭിക്കും. ഇതിന് നിങ്ങളുടെ ആധാര്‍ കാര്‍ഡും ഫോണ്‍ നമ്പറും ഉള്‍പ്പെടുത്തിക്കൊണ്ടുള്ള ഒരു സത്യവാങ്മൂലം റേഷന്‍ വ്യാപാരിക്ക് നല്‍കിയാല്‍ മതി. കിറ്റ് ആവശ്യമില്ലെന്ന് സ്വയം അറിയിക്കുന്നവരേയും നികുതി ദായകരായ ഉയര്‍ന്ന വരുമാനക്കാരേയും ഒഴിവാക്കും. മഞ്ഞ കാര്‍ഡ് - 35 കിലോ അരി, പിങ്ക് കാര്‍ഡ് - കാര്‍ഡിലുള്ള ഒരു അംഗത്തിന് 5 കിലോ വീതം,വെള്ള, നീല കാര്‍ഡുകള്‍ - 15 കിലോ അരി. എന്നിങ്ങനെയാണ് അരി ലഭിക്കുക.
