ആക്രമിക്കപ്പെട്ട നടിക്ക് ഐക്യദാര്ഢ്യം പ്രഖ്യാപിച്ച് സമൂഹമാധ്യമങ്ങളില് കുറിപ്പിടുന്ന സിനിമാ താരങ്ങള്ക്കെതിരെ വിമര്ശനവുമായി എത്തിയിരിക്കുകയാണ് നടന് ജോയ് മാത്യു. 'ഇരയ്ക്കൊപ്പം എന്ന് പറയാന് എളുപ്പമാണ് എന്നാല് കുറ്റവാളിയുമായി സഹകരിക്കില്ലെന്ന് പറയുവാന് ആരുമില്ല' - എന്നാണ് ജോയ് മാത്യു ഫേസ്ബുക്കില് കുറിച്ചത്. ജോയ് മാത്യുവിന്റെ പോസ്റ്റിനെ പിന്തുണച്ച് നിരവധി പേരാണ് പോസ്റ്റിനുതാഴെ കമന്റിടുന്നത്. മാറ്റം താങ്കളിലൂടെയാവട്ടെ, ആ തീരുമാനമെടുക്കാന് ചങ്കൂറ്റം വേണം എന്നിങ്ങനെ പോകുന്നു കമന്റുകള്.
അവഹേളിക്കാനും നിശബ്ദയാക്കാനും ഒറ്റപ്പെടുത്താനും ഒരുപാട് ശ്രമങ്ങളുണ്ടായെന്ന് ആക്രമിക്കപ്പെട്ട നടി തുറന്നുപറഞ്ഞതോടെ സമൂഹ മാധ്യമങ്ങളില് ഐക്യദാര്ഢ്യ പ്രവാഹമാണ്. പ്രിത്വിരാജ്, ടൊവിനോ തോമസ്, കുഞ്ചാക്കോ ബോബന്, ആഷിഖ് അബു, അന്ന ബെന്, ആര്യ, ജിയോ ബേബി, സ്മൃതി കിരണ്, സുപ്രിയ മേനോന് പൃഥ്വിരാജ്, ഫെമിന ജോര്ജ്ജ്, മൃദുല മുരളി, നിമിഷ സജയന്, പൂര്ണിമ ഇന്ദ്രജിത്ത്, ഗീതു മോഹന്ദാസ് തുടങ്ങിയ യുവനിരയാണ് ആദ്യം തന്നെ നടിക്ക് പിന്തുണ പ്രഖ്യാപിച്ച് സമൂഹ മാധ്യമങ്ങളില് #അവള്ക്കൊപ്പം എന്ന ഹാഷ്ടാഗോടുകൂടി പ്രത്യക്ഷപ്പെട്ടത്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
പിന്നീടാണ് സൂപ്പര് താരങ്ങളായ മോഹന്ലാലും മമ്മൂട്ടിയും നടിക്ക് പിന്തുണ പ്രഖ്യാപിച്ച് സമൂഹമാധ്യമങ്ങളില് കുറിച്ചത്. 'നിന്നോടൊപ്പം' എന്നാണ് മമ്മൂട്ടി നടിയുടെ കുറിപ്പ് പങ്കുവെച്ച് ഇന്സ്റ്റഗ്രാമില് കുറിച്ചത്. മമ്മൂട്ടിയുടെ ഇന്സ്റ്റഗ്രാം സ്റ്റോറിക്ക് പിന്നാലെ 'റെസ്പെക്ട്' എന്ന് കുറിച്ചുകൊണ്ട് മോഹന്ലാലും നടിയുടെ വാക്കുകള് പങ്കുവെച്ചു.
കേസിലെ നിര്ണ്ണായക വെളിപ്പെടുത്തലുകള്ക്ക് പിന്നാലെ പുനരന്വേഷണം നടന്നുകൊണ്ടിരിക്കുന്ന സാഹചര്യത്തിലാണ് ആക്രമിക്കപ്പെട്ട നടിയുടെ കുറിപ്പ് വന്നത്. 'കുറ്റം ചെയ്തത് ഞാന് അല്ലെങ്കിലും എന്നെ അവഹേളിക്കാനും നിശബ്ദയാക്കാനും ഒറ്റപ്പെടുത്താനും ഒരുപാട് ശ്രമങ്ങള് ഉണ്ടായിട്ടുണ്ട്. എന്നാല് അപ്പോഴൊക്കെയും ചിലരൊക്കെ നിശബ്ദത ഭേദിച്ച് മുന്നോട്ട് വന്നു. എനിക്ക് വേണ്ടി സംസാരിക്കാന്, എന്റെ ശബ്ദം നിലയ്ക്കാതിരിക്കാന്. ഇന്ന് എനിക്ക് വേണ്ടി നിലകൊള്ളുന്ന ഇത്രയും ശബ്ദങ്ങള് കേള്ക്കുമ്പോള് ഞാന് തനിച്ചല്ലെന്ന് തിരിച്ചറിയുന്നു. നീതി പുലരാനും, തെറ്റ് ചെയ്തവര് ശിക്ഷിക്കപ്പെടാനും ഇങ്ങനെയൊരനുഭവം മറ്റാര്ക്കും ഉണ്ടാവാതിരിക്കാനും ഞാന് ഈ യാത്ര തുടര്ന്നു കൊണ്ടേയിരിക്കും. കൂടെ നില്ക്കുന്ന എല്ലാവരുടെയും സ്നഹത്തിന് നന്ദി'- എന്നായിരുന്നു നടിയുടെ കുറിപ്പ്.