കൊച്ചി: നടിയെ ആക്രമിച്ച കേസില് നടന് ദിലീപിന്റെ മുന് കൂര് ജാമ്യാപേക്ഷ പരിഗണിക്കുന്നത് കോടതി വെള്ളിയാഴ്ചത്തേക്ക് മാറ്റി. കേസ് അന്വേഷിച്ച ഉദ്യോഗസ്ഥരെ അപായപ്പെടുത്താന് ദിലീപ് ഗൂഢാലോചന നടത്തിയെന്ന സംവിധായകന് ബാലചന്ദ്രകുമാറിന്റെ വെളിപ്പെടുത്തലിന്റെ അടിസ്ഥാനത്തിലാണ് ക്രൈംബ്രാഞ്ച് ജാമ്യമില്ലാ വകുപ്പ് പ്രകാരം കേസ് രജിസ്റ്റര് ചെയ്തത്. ഇതിനെതിരെയാണ് ദിലീപ് കോടതിയില് മുന്കൂര് ജാമ്യാപേക്ഷ നല്കിയത്. ഇന്ന് ഉച്ചക്ക് 1. 45ന് കേസ് പരിഗണിക്കുമെന്നാണ് കോടതി അറിയിച്ചിരുന്നത്. എന്നാല്, പ്രോസിക്യൂഷന്റെ ആവശ്യം പ്രകാരമാണ് ജാമ്യാപേക്ഷ പരിഗണിക്കുന്നത് മാറ്റിവെച്ചത്.
ദിലീപിന്റെ ജാമ്യാപേക്ഷയില് വിശദമായ എതിര്സത്യവാങ്മൂലം നല്കേണ്ടതിനാല് ജാമ്യഹര്ജി പരിഗണിക്കുന്നത് നീട്ടി വെക്കണം എന്നായിരുന്നു പ്രോസിക്യൂഷന് കോടതിയെ അറിയിച്ചത്. ജാമ്യഹര്ജി പരിഗണിക്കുമ്പോള് സംവിധായകന് ബാലചന്ദ്രകുമാറിന്റെ രഹസ്യ മൊഴികളും കോടതിയില് ഹാജരാക്കും. ഗൂഢാലോചന കേസുമായി ബന്ധപ്പെട്ട കേസില് പള്സര് സുനിയുടെ അമ്മയുടെ മൊഴിയും ഇന്ന് രേഖപ്പെടുത്തും.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
ക്രൈംബ്രാഞ്ച് ഡി.വൈ.എസ്.പി ബൈജു പൗലോസ് തന്നോടുള്ള പ്രതികാരത്തിന്റെ ഭാഗമായാണ് പുതിയ കേസെടുത്തിരിക്കുന്നതെന്നാണ് ദിലീപിന്റെ വാദം. ഭീഷണിക്കേസ് പൊലീസിന്റെ കള്ളകഥ ആണെന്നും ദിലീപ് ഹര്ജിയില് ആരോപിക്കുന്നു. കേസില് ഒന്നാം പ്രതി ദിലീപും രണ്ടാം പ്രതി സഹോദരന് അനൂപും മൂന്നാം പ്രതി ദിലീപിന്റെ സഹോദരി ഭര്ത്താവ് സുരാജുമാണ്. ജസ്റ്റിസ് പി.ഗോപിനാഥാണ് ഹര്ജി പരിഗണിക്കുന്നത്.