തിരുവനന്തപുരം: സിപിഎം സമ്മേളനങ്ങള് കൊവിഡ് പടര്ത്തുന്ന ഇടങ്ങളായി മാറുകയാണ് എന്ന പ്രതിപക്ഷ നേതാവ് വി ഡി സതീശന്റെ പ്രസ്താവനക്കെതിരെ സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്. ''സിപിഎമ്മിന്റെ ആളുകള്ക്ക് തന്നെ രോഗം പടര്ത്തണം എന്ന ആഗ്രഹം സിപിഎമ്മിനുണ്ടാകുമോ?''. ‘'എത്രയോ പേര്ക്ക് രോഗം വന്നു. അതെല്ലാം സിപിഎം സമ്മേളനത്തില് പങ്കെടുത്തിട്ടാണോ?. മമ്മൂട്ടിക്ക് കൊവിഡ് വന്നത് ഏത് സമ്മേളനത്തില് പങ്കെടുത്തിട്ടാണ്?''-കോടിയേരി ചോദിച്ചു. പ്രതിപക്ഷ നേതാവ് വി ഡി സതീശന് വസ്തുതതകള് പഠിച്ച ശേഷം വേണം പ്രതികരിക്കാനെന്നും കോടിയേരി പറഞ്ഞു.
കൊവിഡ് മാനദണ്ഡങ്ങളും കാറ്റഗറികളും നിശ്ചയിച്ചത് സര്ക്കാരാണെന്നും പാര്ട്ടി ഇടപെടലില്ലെന്നും കോടിയേരിപറഞ്ഞു. സിപിഎം സമ്മേളനങ്ങള് നടത്തുന്നതിന് വേണ്ടി സര്ക്കാരിന്റെ കൊവിഡ് മാനദണ്ഡങ്ങളിലോ കാറ്റഗറി നിര്ണയത്തിലോ ഇടപെട്ടിട്ടില്ല. സമ്മേളനത്തോടനുബന്ധിച്ചുള്ള വിവിധ പരിപാടികള് വേണ്ടെന്ന് വെക്കുകയാണ് പാര്ട്ടി ചെയ്തത്. സമ്മേളന പരിപാടികളൊന്നും പൊതുസ്ഥലങ്ങളില് വെച്ച് നടക്കുന്നില്ല. കളക്ടര്മാരുടെ അനുവാദത്തോടുകൂടിയാണ് ഹാളുകളില് പരിപാടി നടത്തുന്നതെന്നും കോടിയേരി പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
കൊവിഡ് പടരുന്നതിനിടെ സി പി എം സമ്മേളനങ്ങള് നടക്കുന്ന ജില്ലകളെ കൊവിഡ് നിയന്ത്രണങ്ങളുള്ള കാറ്റഗറിയില് നിന്നും ഒഴിവാക്കിയെന്ന വിമര്ശനമുയര്ന്നതോടെയാണ് കോടിയേരി വിശദീകരണവുമായെത്തിയത്. പാര്ട്ടി സമ്മേളനങ്ങളില് പങ്കെടുത്ത് കൊവിഡ് പോസിറ്റീവായ നൂറുകണക്കിന് സിപിഎം നേതാക്കളുണ്ടെന്നും, പലരും ക്വാറന്റീനില് പോലും പോകാതെ രോഗവാഹകരായി മാറുകയാണ് എന്നുമായിരുന്നു പ്രതിപക്ഷ നേതാവ് വി ഡി സതീശന് ആരോപിച്ചത്. പാര്ട്ടി സമ്മേളനങ്ങള് നടക്കാനിരിക്കുന്ന ജില്ലകളെ കൊവിഡ് കാറ്റഗറിയില് നിന്ന് ഒഴിവാക്കി എന്നും സതീശന് ആരോപിച്ചിരുന്നു.
