ലക്നൗ: ഉത്തര്പ്രദേശില് അടുത്തമാസം നടക്കുന്ന നിയമസഭാ തെരഞ്ഞെടുപ്പില് മുഖ്യമന്ത്രി സ്ഥാനാര്ത്ഥിയായി എ ഐ സി സി ജനറല് സെക്രട്ടറി പ്രിയങ്കാ ഗാന്ധി തന്നെ മത്സരിക്കുമെന്ന് സൂചന. യുപിയിലെ യുവാക്കള്ക്കായുളള പ്രകടന പത്രിക പുറത്തിറക്കുന്നതിനിടെ പ്രിയങ്ക തന്നെയാണ് മുഖ്യമന്ത്രി സ്ഥാനാര്ത്ഥിയായി താന് തന്നെ മത്സരിക്കുമെന്ന തരത്തിലുളള സൂചന നല്കിയത്. കോണ്ഗ്രസിന്റെ മുഖ്യമന്ത്രി സ്ഥാനാര്ത്ഥി ആരായിരിക്കുമെന്ന മാധ്യമപ്രവര്ത്തകരുടെ ചോദ്യത്തിന് മറ്റൊരു മുഖം നിങ്ങള് കാണുന്നുണ്ടോ? എന്റെ മുഖം നിങ്ങള്ക്ക് എല്ലായിടത്തും കാണാനാവും എന്നായിരുന്നു പ്രിയങ്കയുടെ മറുപടി.
ഉത്തര്പ്രദേശിലെ തെരഞ്ഞെടുപ്പില് കോണ്ഗ്രസിന്റെ മുഖ്യമന്ത്രി സ്ഥാനാര്ത്ഥി ആരെന്നതിനെക്കുറിച്ച് ഇതുവരെ ഔദ്യോഗിക പ്രഖ്യാപനങ്ങള് പുറത്തുവന്നിട്ടില്ലെങ്കിലും പ്രിയങ്ക തന്നെയാവും മത്സരിക്കുക എന്നാണ് വിലയിരുത്തല്. പ്രിയങ്ക സ്ഥാനാര്ത്ഥിയാവുകയാണെങ്കില് ഗാന്ധി കുടുംബത്തില് നിന്ന് നിയമസഭാ തെരഞ്ഞെടുപ്പില് മത്സരിക്കുന്ന ആദ്യത്തേയാളാവും അവര്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
ഉത്തര്പ്രദേശ് നിയമസഭാ തെരഞ്ഞെടുപ്പില് കോണ്ഗ്രസിന്റെ ആദ്യഘട്ട സ്ഥാനാര്ത്ഥിപ്പട്ടികയില് 40 ശതമാനവും സ്ത്രീകളായിരുന്നു. ഉന്നാവോ കൂട്ടബലാത്സംഗക്കേസിലെ ഇരയുടെ അമ്മയടക്കം 125 സ്ഥാനാര്ത്ഥികളാണ് കോണ്ഗ്രസിന്റെ ആദ്യഘട്ട പട്ടികയില് ഇടംപിടിച്ചത്. ഫെബ്രുവരി പത്ത് മുതലാണ് ഉത്തര്പ്രദേശില് നിയമസഭാ തെരഞ്ഞെടുപ്പ് നടക്കുന്നത്. ഏഴ് ഘട്ടങ്ങളിലായാണ് 403 സീറ്റുകളിലേക്കുളള തെരഞ്ഞെടുപ്പ് നടക്കുന്നത്. മാര്ച്ച് പത്തിനാണ് വോട്ടെണ്ണല് നടക്കുക.