തിരുവനന്തപുരം: കൊറോണ വൈറസ് പ്രതിരോധ പ്രവര്ത്തനങ്ങളുടെയും ലോക്ക് ഡൌണിന്റെയും പശ്ചാത്തലത്തില് ദേശാഭിമാനി ദിനപത്രത്തിലെ ജീവനക്കാര് മുഖ്യമന്ത്രിയുടെ ദുരിതാശ്വാസനിധിയിലേക്ക് ഒരുകോടി ഏഴുലക്ഷം രൂപ (1.07 കോടി) സംഭാവനയായി നല്കി. ദേശാഭിമാനി ദിനപത്രത്തിലെയും അനുബന്ധ പ്രസിദ്ധീകരണങ്ങളിലേയും മാനേജീരിയല് വിഭാഗം ഉദ്യോഗസ്ഥരും പത്രപ്രവര്ത്തകരുമടങ്ങുന്ന ജീവനക്കാര് നല്കിയ തുക മാനേജ്മെന്റ് പ്രതിനിധികള് മുഖ്യമന്ത്രിയുടെ ഓഫീസിനു കൈമാറി.
ദേശാഭിമാനി ദിനപത്രത്തിലെ എഴുനൂറോളം ജീവനക്കാര് നല്കിയ ഒരുമാസത്തെ ശമ്പളത്തുകയാണ് ദുരിതാശ്വാസനിധിലേക്ക് കൈമാറിയത്. കൊറോണാ വ്യാപനകാലത്ത് മാധ്യമ -മാധ്യമേതര സ്വകാര്യ സ്ഥാപനങ്ങളില് ഒരുമാസത്തെ ശമ്പളം സംഭാവന ചെയ്യുന്ന ആദ്യത്തെ സ്ഥാപനമാണ് ദേശാഭിമാനി. കഴിഞ്ഞ പ്രളയ കാലത്തും ദേശാഭിമാനി ജീവനക്കാര് ഒരുമാസത്തെ ശമ്പളം മുഖ്യമന്ത്രിയുടെ ദുരിതാശ്വാസനിധിയിലേക്ക് സംഭാവനയായി നല്കിയിരുന്നു.
