ഡല്ഹി: ഈ മാസം നടക്കാനിരിക്കുന്ന ഉത്തര്പ്രദേശ് നിയമസഭാ തെരഞ്ഞെടുപ്പില് ബിജെപിയെ തോല്പ്പിക്കുകയാണ് തങ്ങളുടെ ലക്ഷ്യമെന്ന് സംയുക്ത കിസാന് മോര്ച്ച. രാജ്യത്തെ കര്ഷകരുടെ ആവശ്യങ്ങളെ കേള്ക്കാതെ വഞ്ചിച്ച ബിജെപിയെ തെരഞ്ഞെടുപ്പില് 'ശിക്ഷിക്കണ'മെന്ന് എസ് കെ എം നേതാവ് യോഗേന്ദ്ര യാദവ് ജനങ്ങളോട് ആവശ്യപ്പെട്ടു. എസ് കെ എമ്മിന്റെ ആവശ്യത്തെ 57 കര്ഷകസംഘടനകള് പിന്തുണച്ചിട്ടുണ്ടെന്നും കര്ഷകരുടെ ലക്ഷ്യം ഏതെങ്കിലും ഒരു പാര്ട്ടിയെ ജയിപ്പിക്കുക എന്നതല്ല മറിച്ച് ബിജെപിയെ തോല്പ്പിക്കുക മാത്രമാണെന്നും അദ്ദേഹം കൂട്ടിച്ചേര്ത്തു. ഡല്ഹിയില് നടന്ന വാര്ത്താ സമ്മേളനത്തിലാണ് കര്ഷകസംഘടന ബിജെപിയെ പരാജയപ്പെടുത്താന് ആഹ്വാനം ചെയ്തത്.
'കാര്ഷിക നിയമങ്ങള് പിന്വലിച്ചു എന്ന് പ്രഖ്യാപിച്ചെങ്കിലും മിനിമം താങ്ങുവില( എം എസ് പി) സംബന്ധിച്ച് ചര്ച്ചകള്ക്കായി കമ്മിറ്റി രൂപീകരിക്കുക, കര്ഷകര്ക്കെതിരായ കേസുകള് പിന്വലിക്കുക തുടങ്ങിയ നമ്മുടെ ആവശ്യങ്ങളൊന്നും സര്ക്കാര് ഇതുവരെ അംഗീകരിച്ചിട്ടില്ല. കര്ഷകരെ വഞ്ചിച്ചതിന് തെരഞ്ഞെടുപ്പില് ബിജെപിയെ തോല്പ്പിക്കണം. വാഗ്ദാനങ്ങള് പാലിക്കാന് സര്ക്കാരിന് ഇതുവരെ സാധിച്ചിട്ടില്ല. വരും ദിവസങ്ങളില് മീററ്റ്, ലക്നൗ, കാണ്പൂര്, സിദ്ധാര്ത്ഥനഗര്, ഖൊരക്പൂര് തുടങ്ങി യുപിയിലെ വിവിധയിടങ്ങളില് സംയുക്ത കിസാന് മോര്ച്ച വാര്ത്താസമ്മേളനങ്ങള് സംഘടിപ്പിക്കും. മറ്റ് രാഷ്ട്രീയപാര്ട്ടികള്ക്കായി വോട്ടുചോദിക്കുകയല്ല കര്ഷകരുടെ ലക്ഷ്യം. സംയുക്ത കിസാന് മോര്ച്ചയ്ക്ക് രാഷ്ട്രീയപാര്ട്ടികളുമായി യാതൊരു ബന്ധവുമില്ല'- യോഗേന്ദ്ര യാദവ് പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
നേരത്തെ, യുപിയിലും പഞ്ചാബിലുമടക്കം വരാനിരിക്കുന്ന തെരഞ്ഞെടുപ്പുകളില് ആര്ക്ക് വോട്ട് ചെയ്യണമെന്ന് രാജ്യത്തെ കര്ഷകര്ക്കറിയാമെന്ന് സംയുക്ത കിസാന് മോര്ച്ച നേതാവ് രാകേഷ് ടികായത്ത് പറഞ്ഞിരുന്നു. വരുന്ന തെരഞ്ഞെടുപ്പുകളില് എന്ത് ചെയ്യണമെന്നും ആര്ക്ക് വോട്ടുചെയ്യണമെന്നും ഒരുവര്ഷത്തോളം മഞ്ഞത്തും വെയിലത്തും നടുറോഡില് പ്രതിഷേധിച്ച കര്ഷകര്ക്കറിയാമെന്നും ബിജെപിയോട് മയപ്പെടാന് അവിടെ പ്രതിഷേധിച്ച ഒരാള്ക്കും സാധിക്കില്ലെന്നുമാണ് രാകേഷ് ടികായത്ത് പറഞ്ഞത്.
