അഴിമതിവീരനായ മുഖ്യമന്ത്രിക്ക് കുടപിടിക്കുന്ന ഭരണത്തലവനായി ഗവര്ണര് മാറിയത് കേരളത്തിന്റെ മഹാദുരന്തമാണെന്ന് കെപിസിസി പ്രസിഡന്റ് കെ. സുധാകരന്. 'കൊല്ലുന്ന രാജാവിന് തിന്നുന്ന മന്ത്രി' എന്ന പോലെയാണ് അത്. കാഴ്ചക്കാരായി മാറിയ സി.പി.ഐയുടെ അവസ്ഥയും പരിതാപകരമാണെന്നും അദ്ദേഹം പറഞ്ഞു. ലോകായുക്ത ഓര്ഡിനെന്സില് ഗവര്ണ്ണര് ഒപ്പുവച്ചതിനോട് പ്രതികരിക്കുകയായിരുന്നു അദ്ദേഹം. 'സംസ്ഥാനത്ത് അഴിമതിക്കെതിരെ പോരാടാനുള്ള അവസാന കച്ചിത്തുരുമ്പായിരുന്നു ലോകായുക്ത. വിജിലന്സിലനെയും മറ്റും പിണറായി സര്ക്കാര് വന്ധീകരിച്ചപ്പോള് ജനങ്ങള്ക്കുണ്ടായിരുന്ന ഏക പ്രതീക്ഷയെയാണ് ഇല്ലാതാക്കിയിരിക്കുന്നത്. നിയമഭേദഗതിയുടെ പ്രസക്തി നഷ്ടപ്പെട്ട ലോകായുക്തയെ പിരിച്ചുവിടുന്നതാണ് ഉചിതം' - സുധാകരന് പറഞ്ഞു.
നിലവിലെ ലോകായുക്ത നിയമത്തിലെ പതിനാലാം വകുപ്പ് ഭരണഘടന വിരുദ്ധമാണ് എന്ന് ചൂണ്ടിക്കാട്ടിയാണ് സര്ക്കാര് നിയമഭേദഗതിക്കൊരുങ്ങുന്നത്. തുടക്കംമുതല് ഗവര്ണ്ണര് ബില്ലിനെതിരായിരുന്നു. വിദേശ സന്ദർശനം കഴിഞ്ഞ് തിരിച്ചെത്തിയ മുഖ്യമന്ത്രി പിണറായി വിജയൻ കഴിഞ്ഞ ദിവസം ഗവര്ണ്ണറെകണ്ട് കാര്യങ്ങള് വിശദീകരിച്ചതോടെയാണ് അദ്ദേഹം നിലപാട് മാറ്റിയത്. ലോകയുക്ത വിധി സർക്കാരിന് തള്ളാൻ അധികാരം നൽകുന്നതാണ് പുതിയ ഭേദഗതി. ലോകായുക്ത ജഡ്ജിയുടെ യോഗ്യതയും ഇളവ് ചെയ്യും. സുപ്രീം കോടതിയിൽ ജഡ്ജി ആയിരുന്ന വ്യക്തിയോ ഹൈക്കോടതി ചീഫ് ജസ്റ്റിസ് ആയിരുന്ന വ്യക്തിയോ ആണ് ലോകായുക്ത ആയിരുന്നത്. ഈ പദവി ഇളവ് ചെയ്തു. പുതിയ ഭേദഗതി പ്രകാരം ഹൈക്കോടതി ജഡ്ജിയായിരുന്ന വ്യക്തിക്ക് ലോകായുക്തയാകാം. ഹൈക്കോടതിയിലെ നിലവിലുള്ള ജഡ്ജിക്ക് ഉപലോകായുക്തയാകാമെന്ന വ്യവസ്ഥയും മാറ്റിയിട്ടുണ്ട്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
എന്നാല് ലോകയുക്തയുടെ പല്ലും നഖവും പിഴുതെടുക്കുന്നതാണ് ഓർഡിനൻസെന്ന് സുധാകരന് ആരോപിക്കുന്നു. 'കടിക്കാന് പോയിട്ട് കുരയ്ക്കാന് പോലും ശക്തിയില്ലാത്ത പുതിയ സംവിധാനത്തില് തുടരണോയെന്ന് ആദരണീയരായ ജഡ്ജിമാര് ചിന്തിക്കണം. പഠനം ചെയ്തും മനനം ചെയ്തും പുറപ്പെടുവിക്കുന്ന വിധികള് ഭരണാധികാരികള് ചവറ്റുകുട്ടയിലേക്കു വലിച്ചെറിയുന്ന പുതിയ സാഹചര്യമാണ് ഉരുത്തിരിയുന്നത്. ആത്മാഭിമാനത്തോടെ അവിടെ ജോലി ചെയ്യാന് ഇനിയാര്ക്കും കഴിയുമെന്നു തോന്നുന്നില്ല. നിര്ജ്ജീവവും ആത്മാവില്ലാത്തതുമായ ലോകായുക്തയെ കേരളത്തിന് ആവശ്യമില്ലെന്നും' അദ്ദേഹം പറഞ്ഞു.
