ബംഗളുരു: മഹാത്മാഗാന്ധിയുടെ ചിത്രത്തിനുസമീപം അംബേദ്കറുടെ ചിത്രം വയ്ക്കുന്നതിനെ എതിര്ത്ത ജഡ്ജിക്കെതിരെ നടപടിയെടുക്കണമെന്നാവശ്യപ്പെട്ട് ബംഗളുരുവില് ദളിത് സംഘടനകളുടെ പ്രതിഷേധം. ശനിയാഴ്ചയായിരുന്നു ലക്ഷക്കണക്കിനുപേര് പങ്കെടുത്ത പ്രതിഷേധ മാര്ച്ച് നടന്നത്. 'സംവിധാന സംരക്ഷണ മഹാ ഒക്കൂട്ട'ന്റെ നേതൃത്വത്തിലായിരുന്നു വമ്പന് പ്രതിഷേധ റാലി സംഘടിപ്പിച്ചത്. ബംഗളുരു സിറ്റി റെയില്വേ സ്റ്റേഷനില്നിന്ന് ആരംഭിച്ച മാര്ച്ച് വിധാന് സൗധ വഴി അനന്തറാവു സര്ക്കിളിലാണ് സമാപിച്ചത്. റായ്ച്ചൂര് ജില്ലാ ജഡ്ജി മല്ലികാര്ജുന ഗൗഡ പാട്ടിലിനെ സസ്പെന്ഡ് ചെയ്യണമെന്നാണ് പ്രതിഷേധക്കാരുടെ ആവശ്യം.
ദളിത് സംഘര്ഷ സമിതി, അനുബന്ധ ദളിത് സംഘടനകള്, തൊഴിലാളി യൂണിയനുകള്, കര്ഷകര്, വനിതാ സംഘടനകള്, വിദ്യാര്ത്ഥി സംഘടനകള് തുടങ്ങിയവയില് നിന്നുളള ലക്ഷക്കണക്കിനുപേരാണ് പ്രതിഷേധത്തില് പങ്കെടുത്തത്. ജഡ്ജിയെ സസ്പെന്ഡ് ചെയ്യണം. എല്ലാ കോടതികളിലും അംബേദ്കറുടെ ചിത്രം സ്ഥാപിക്കണം. ജഡ്ജിമാരെ നിയമിക്കുമ്പോള് പട്ടികജാതി-ന്യൂനപക്ഷ വിഭാഗങ്ങള്ക്കും സ്ത്രീകള്ക്കും പരിഗണന നല്കണം തുടങ്ങിയ കാര്യങ്ങളാണ് പ്രതിഷേധക്കാര് ആവശ്യപ്പെട്ടത്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
റായ്ച്ചൂര് ജില്ലാ കോടതിയിലെ റിപ്പബ്ലിക് ദിന ചടങ്ങിനിടെ മഹാത്മാ ഗാന്ധിയുടെ ചിത്രത്തിനൊപ്പമുണ്ടായിരുന്ന അംബേദ്കറുടെ ചിത്രം എടുത്തുമാറ്റാന് ജഡ്ജി മല്ലികാര്ജുന ഗൗഡ ആവശ്യപ്പെട്ടതാണ് വിവാദങ്ങള്ക്കുകാരണമായത്. എന്നാല് താന് അംബേദ്കറെ അപമാനിക്കാന് ഉദ്ദേശിച്ചിരുന്നില്ലെന്നാണ് മല്ലികാര്ജുന ഗൗഡയുടെ വിശദീകരണം. അംബേദ്കറുടെ ചിത്രം മഹാത്മാഗാന്ധിയുടെ അടുത്തുനിന്നും മാറ്റിയിട്ടില്ലെന്നും തനിക്കെതിരെ തെറ്റായ പ്രചാരണങ്ങളാണ് നടക്കുന്നതെന്നും അദ്ദേഹം പറഞ്ഞു. ഗൗഡയെ കഴിഞ്ഞ ദിവസം ഹൈക്കോടതി സ്ഥലംമാറ്റിയിരുന്നു. കര്ണാടക സ്റ്റേറ്റ് ട്രാന്സ്പോര്ട്ട് അപ്പലറ്റ് അതോറിറ്റിയിലേക്കാണ് സ്ഥലംമാറ്റിയത്.