ചിക്കബല്ലപുര: കര്ണാടകയിലെ പ്രശസ്ത വിനോദ സഞ്ചാര കേന്ദ്രമായ നന്ദി ഹില്സില് ട്രക്കിംഗിനിടെ 18-കാരന് 200 അടി താഴ്ചയിലേയ്ക്ക് വീണു. മലയിടുക്കില് കുടുങ്ങിയ നിഷാങ്ക് എന്ന യുവാവിനെ ഇന്ത്യന് വ്യോമസേനയും ദുരന്തനിവാരണ സേനയും സംയുക്തമായി നടത്തിയ ഓപ്പറേഷനിലൂടെ രക്ഷപ്പെടുത്തി. ഒറ്റയ്ക്ക് ട്രക്കിംഗിനെത്തിയ നിഷാങ്ക് കാല് വഴുതി മലയിടുക്കിലേയ്ക്ക് വീഴുകയായിരുന്നു. ഭാഗ്യവശാല് യുവാവ് മലയിടുക്കില് തങ്ങി നിന്നെന്നും അവിടെ നിന്നും താഴേയ്ക്ക് വീണിരുന്നെങ്കില് വന് അപകടം സംഭവിക്കുമായിരുന്നു എന്നും ചിക്കബല്ലപുര എസ്പി ജി. കെ. മിഥുന് കുമാര് പറഞ്ഞു.
അപകടമുണ്ടായപ്പോള് തന്നെ യുവാവ് പോലീസിനെ വിവരം അറിയിക്കുകയും ലൊക്കേഷന് പങ്കുവെയ്ക്കുകയും ചെയ്തിരുന്നു. ഉടന് തന്നെ പോലീസും എസ്ഡിആര്എഫ്, എന്ഡിആര്എഫ് സേനാംഗങ്ങളും സ്ഥലത്തെത്തിയെങ്കിലും നിഷാങ്കിനെ രക്ഷിക്കാന് സാധിച്ചില്ല. തുടര്ന്നാണ് ഇന്ത്യന് വ്യോമസേനയുടെ സഹായം തേടിയത്. പോലീസ് കൈമാറിയ വിവരങ്ങള് അനുസരിച്ച് വ്യോമസേന നടത്തിയ തിരച്ചിലില് യുവാവ് കുടുങ്ങിയ സ്ഥലം കണ്ടെത്തി. അനങ്ങാന് പോലും കഴിയാത്ത സ്ഥിതിയിലായിരുന്നു യുവാവ് എന്ന് അധികൃതര് പറഞ്ഞു. അപകടമുണ്ടായ മേഖല ലാന്ഡിംഗിന് അനുയോജ്യമായിരുന്നില്ല. ഇതോടെ ഹെലികോപ്റ്ററിന്റെ ഫ്ളൈറ്റ് ഗണ്ണര് താഴ്ത്തിയ ശേഷം നിഷാങ്കിനെ ഉയര്ത്തിയെടുക്കുകയായിരുന്നു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
രക്ഷപ്പെടുത്തിയ നിഷാങ്കിനെ യെലങ്കയിലെ സിവില് ആശുപത്രിയില് പ്രവേശിപ്പിച്ചു. ഡല്ഹി സ്വദേശിയായ യുവാവ് ബംഗളൂരുവിലെ എഞ്ചിനീയറിംഗ് കോളേജിലെ വിദ്യാര്ത്ഥിയാണ്. അടുത്തിടെ പാലക്കാട് ചേറാട് മലയിടുക്കില് കുടുങ്ങിയ ബാബു എന്ന യുവാവിനെ സമാനമായ രീതിയില് രക്ഷപ്പെടുത്തിയത് ദേശീയ ശ്രദ്ധയാകര്ഷിച്ചിരുന്നു. ഭക്ഷണവും വെള്ളവുമില്ലാതെ 40 മണിക്കൂറിലേറെ കുറുമ്പാച്ചി മലയിടുക്കില് കുടുങ്ങിയ ബാബുവിനെ ഏറെ പ്രയാസപ്പെട്ടാണ് രക്ഷപ്പെടുത്തിയത്.