കൊച്ചി: കൊവിഡ് മാനദണ്ഡം പാലിക്കാതെ പാര്ട്ടിയും മറ്റ് സംഘടനകളും നടത്തുന്ന സമ്മേളനങ്ങള് തടയണമെന്ന് ആവശ്യപ്പെട്ട് നല്കിയ ഹര്ജി ഹൈക്കോടതി തള്ളി. പരാതി ഉന്നയിച്ചയാള് പബ്ലിസിറ്റിയാണ് ലക്ഷ്യം വെക്കുന്നതെന്നും ചീഫ് ജസ്റ്റിസ് ഉള്പ്പെട്ട ഡിവിഷന് ബെഞ്ച് അഭിപ്രായപ്പെട്ടു. കൊവിഡ് നിയന്ത്രണങ്ങള് പാലിക്കാതെ കാസര്കോട് സി.പി.എം ജില്ലാ സമ്മേളനം നടത്തുന്നതിനെതിരെ ഹര്ജിക്കാരന് നേരത്തെ ഹൈക്കോടതിയെ സമീപിച്ചിരുന്നു. ഹര്ജി പരിഗണിച്ച കോടതി, സമ്മേളനങ്ങളില് നിയന്ത്രണം ഏര്പ്പെടുത്താന് നിര്ദ്ദേശവും നല്കിയിരുന്നു. ഇതിന് പിന്നാലെയാണ് സംസ്ഥാനത്ത് നടക്കുന്ന എല്ലാ സമ്മേളനങ്ങള്ക്കെതിരെയും പരാതിക്കാരന് കോടതിയെ വീണ്ടും സമീപിച്ചത്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
കൊവിഡിന്റെ സാഹചര്യത്തില് പൊതുയോഗങ്ങളും മറ്റും നിയന്ത്രിച്ച് സര്ക്കാര് ജനുവരി 20-ന് ഇറക്കിയ ഉത്തരവ് ഇപ്പോഴും നിലവിലുണ്ട്. ഇത് പിന്വലിക്കാന് സര്ക്കാര് തയ്യാറായിട്ടില്ല. ഈ ഉത്തരവ് ലംഘിച്ചാണ് ഭരണ പ്രതിപക്ഷ രാഷ്ട്രീയ പാര്ട്ടികള് പൊതു യോഗങ്ങളും സമ്മേളനങ്ങളും നടത്തുന്നതെന്നാണ് ഹര്ജിക്കാരന്റെ ആരോപണം. കേരളത്തില് അടുത്തിടെയുണ്ടായ രാഷ്ട്രീയ കൊലപാതകങ്ങളും അതില് പ്രതിഷേധിച്ച് നടത്തിയ പൊതുയോഗവും സമ്മേളനങ്ങളും ഹര്ജിയില് ചൂണ്ടിക്കാട്ടിയിരുന്നു. തിരുവനന്തപുരം സ്വദേശി അരുണ് രാജാണ് ഹര്ജി നല്കിയത്.
