കൊച്ചി: ടൊവിനോ തോമസ് നായകനായെത്തുന്ന തല്ലുമാല സിനിമാ സെറ്റില് സംഘര്ഷം. എച്ച് എം ഡി എസ് മാപ്പിളാസ് ഗോഡൗണില് വെച്ച് സിനിമയുടെ ചിത്രീകരണം നടക്കുന്നതിനിടെയാണ് സംഘര്ഷമുണ്ടായത്. സിനിമാ പ്രവര്ത്തകര് പ്രദേശത്ത് മാലിന്യമിടുന്നത് ചോദ്യംചെയ്ത നാട്ടുകാരനെ നടന് ഷൈന് ടോം ചാക്കോ മര്ദ്ദിച്ചെന്നാണ് ആരോപണം. സംഘര്ഷത്തിനിടെ പരിക്കേറ്റ ഷമീര് എന്ന യുവാവിനെ കളമശേരിയിലെ ആശുപത്രിയില് പ്രവേശിപ്പിച്ചു.
ഇന്നലെ രാത്രി മുതല് സ്ഥലത്ത് നാട്ടുകാരും ചിത്രത്തിന്റെ അണിയറ പ്രവര്ത്തകരും തമ്മില് തര്ക്കങ്ങളുണ്ടായിരുന്നു. ഇന്ന് രാവിലെ വീണ്ടും തര്ക്കമുണ്ടായി. ചിത്രീകരണം തടസപ്പെടുത്തിയ നാട്ടുകാര് ചലച്ചിത്ര പ്രവര്ത്തകരെ തടഞ്ഞുവയ്ക്കുകയും ചെയ്തു. തുടര്ന്ന് ഷൈന് ടോം ചാക്കോ ഇടപെടുകയും സിനിമാ സംഘവും നാട്ടുകാരും തമ്മില് ഉന്തും തളളും ഉണ്ടാവുകയുമായിരുന്നു. ടൊവിനോ തോമസും പ്രശ്നത്തില് ഇടപെട്ടതോടെ പ്രദേശത്ത് സംഘര്ഷാവസ്ഥയുണ്ടായി. പിന്നീട് പൊലീസെത്തി ഇരുകൂട്ടരോടും സംസാരിച്ച് സ്ഥിതിഗതികള് ശാന്തമാക്കുകയായിരുന്നു. സംഭവത്തില് ആരും പരാതി നല്കിയിട്ടില്ലെന്ന് പൊലീസ് അറിയിച്ചു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
ഉണ്ട എന്ന ചിത്രത്തിനുശേഷം ഖാലിദ് റഹ്മാന് സംവിധാനം ചെയ്യുന്ന ചിത്രമാണ് തല്ലുമാല. ടൊവിനോ തോമസ് നായകനായെത്തുന്ന ചിത്രത്തില് ഷറഫുദ്ദീന്, ഷൈന് ടോം ചാക്കോ, ലുക്മാന്, ചെമ്പന് വിനോദ്, കല്യാണി പ്രിയദര്ശന്, സൗഭിന് ഷാഹിര് തുടങ്ങിയവരും പ്രധാന കഥാപാത്രങ്ങളെ അവതരിപ്പിക്കുന്നുണ്ട്. മുഹ്സിന് പരാരിയും അഷ്റഫ് ഹംസയും ചേര്ന്ന് കഥയെഴുതുന്ന ചിത്രം നിര്മ്മിക്കുന്നത് ആഷിക് ഉസ്മാനാണ്.