ഡല്‍ഹി: അഞ്ച് സംസ്ഥാനങ്ങളിലെയും തെരഞ്ഞെടുപ്പിലെ ബിജെപിയുടെ വിജയം 2024-ല്‍ വരാനിരിക്കുന്ന പൊതുതെരഞ്ഞെടുപ്പ് ഫലത്തിന്റെ സൂചനയാണെന്ന പ്രധാനമന്ത്രി നരേന്ദ്രമോദിയുടെ പ്രസ്താവനക്കെതിരെ തെരഞ്ഞെടുപ്പ് തന്ത്രഞ്ജന്‍ പ്രശാന്ത് കിഷോര്‍. രാജ്യത്തിനായുളള പോരാട്ടം നടക്കുന്നത് 2024-ല്‍ ആണെന്നും ഏതെങ്കിലും സംസ്ഥാനത്തെ തെരഞ്ഞെടുപ്പ് ഫലമല്ല അത് നിശ്ചയിക്കുന്നതെന്നും അദ്ദേഹം പറഞ്ഞു. ട്വിറ്ററിലൂടെയായിരുന്നു അദ്ദേഹത്തിന്റെ പ്രതികരണം.
'ഇന്ത്യയ്ക്കുവേണ്ടിയുളള പോരാട്ടം നടക്കുന്നതും തീരുമാനിക്കപ്പെടുന്നതുമെല്ലാം 2024-ലാണ്. അല്ലാതെ ഏതെങ്കിലും സംസ്ഥാന തെരഞ്ഞെടുപ്പുകളിലല്ല. സാഹിബിന് ഇക്കാര്യം അറിയാം. എങ്കിലും സംസ്ഥാനങ്ങളിലെ തെരഞ്ഞെടുപ്പ് ഫലം പൊതുതെരഞ്ഞെടുപ്പിലെ ഫലത്തിന്റെ സൂചനയാണെന്ന് വരുത്തിത്തീര്‍ത്ത് പ്രതിപക്ഷത്തിനുമേല്‍ മനശാസ്ത്രപരമായ മേല്‍ക്കൈ നേടാനുളള ബുദ്ധിപരമായ നീക്കമാണിത്. ആ തെറ്റായ ആഖ്യാനത്തില്‍ വീഴുകയോ അതിന്റെ ഭാഗമാവുകയോ ചെയ്യരുത്'- പ്രശാന്ത് കിഷോര്‍ ട്വിറ്ററില്‍ കുറിച്ചു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
2024-ല്‍ ബിജെപി സര്‍ക്കാര്‍ വീണ്ടും അധികാരത്തിലെത്തുമെന്നതിന്റെ സൂചനയാണ് നിയമസഭാ തെരഞ്ഞെടുപ്പുകളിലെ വിജയം എന്നാണ് നരേന്ദ്രമോദി കഴിഞ്ഞ ദിവസം പറഞ്ഞത്. 2017-ല്‍ യുപിയില്‍ വിജയിച്ചു. 2019-ല്‍ ലോക്‌സഭയില്‍ ബിജെപിക്ക് തുടര്‍ഭരണം കിട്ടി. 2022-ല്‍ യുപിയില്‍ വിജയം ആവര്‍ത്തിച്ചു. 2024-ല്‍ കേന്ദ്രത്തില്‍ വീണ്ടും അധികാരത്തില്‍ വരും എന്നാണ് മോദി പറഞ്ഞത്.
