ലക്നൌ: മുസ്ലീങ്ങളുടെയും ദളിത്‌ വിഭാഗങ്ങളുടെയും വോട്ടുകള്‍ ചിതറിപ്പോയതാണ് ഉത്തര്‍പ്രദേശില്‍ ബിജെപിയുടെ തുടര്‍ഭരണത്തിന് സഹായകമായത് എന്ന് ബഹുജന്‍ സമാജ് പാര്‍ട്ടി അധ്യക്ഷയും മുന്‍ മുഖ്യമന്ത്രിയുമായ മായാവതി പറഞ്ഞു. ഈ രണ്ടു വിഭാഗങ്ങളുടെയും വോട്ടുകള്‍ ഒന്നിച്ചിരുന്നുവെങ്കില്‍ ബംഗാളില്‍ തൃണമുല്‍ നേടിയ വിജയം യുപിയില്‍ ബിജെപിക്കെതിരെ നേടാന്‍ കഴിയുമായിരുന്നുവെന്നും മായാവതി പറഞ്ഞു. "ഒബിസി സമുദായങ്ങളില്‍ നിന്നുള്ളവരും കീഴ്ജാതിക്കാരുമാണ് ബിഎസ്പിയെ പിന്തുണയ്ക്കുന്നത്. അവര്‍ എസ്പി അധികാരത്തില്‍ വരാതിരിക്കാന്‍ അവര്‍ ബിജെപിക്ക് വോട്ട് ചെയ്തു. അതിനുകാരണം സമാജ് വാദി പാര്‍ട്ടിയുടെ ജംഗിള്‍ രാജ് ഭയമായിരുന്നു"-മായവതി വിശകലനം ചെയ്തു.
''ബിജെപിയെ ഭയന്ന് മുസ്ലീങ്ങള്‍ സമാജ് വാദി പാര്‍ട്ടിക്കാണ് വോട്ടുചെയ്തത്. അതേസമയം സമാജ് വാദി പാര്‍ട്ടിയുടെ ജംഗിള്‍ രാജ് ഭയന്ന് ദളിതര്‍ ബിജെപിക്കും വോട്ടു ചെയ്തു. ഇതാണ് ബിഎസ്പിയുടെ പരാജയത്തിന് കാരണം. മുസ്ലീം വിഭാഗത്തിന്റെ പിന്തുണയുണ്ടായിരുന്നുവെങ്കില്‍ ബിജെപിയെ പരാജയപ്പെടുത്താന്‍ കഴിയുമായിരുന്നു. പ്രതീക്ഷിച്ചതുപോലെ ത്രികോണ പോരാട്ടം നടന്നിരുന്നെങ്കില്‍ ബിഎസ്പിക്ക് തികച്ചും വ്യത്യസ്തമായ പ്രകടനം കാഴ്ചവെക്കാമായിരുന്നു. ബിജെപിയെ തടയാന്‍ കഴിയുമായിരുന്നു''- മായവതി കൂട്ടിച്ചേര്‍ത്തു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
''വലിയ വര്‍ഗീയ ധ്രുവീകരണമാണ് ബിജെപിയെ വിജയത്തിലെത്തിച്ചത്. ആക്രമണോത്സുകമായ മുസ്‌ലിം വിരുദ്ധ പ്രചാരണമാണ് ബിജെപി നടത്തിയതെന്നും മായാവതി ചൂണ്ടിക്കാട്ടി. മുസ്ലീം വിഭാഗത്തിന്റെ പിന്തുണ ബഹുജന്‍ സമാജ് പാര്‍ട്ടിക്കായിരുന്നുവെങ്കില്‍ കാര്യങ്ങള്‍ മറ്റൊരു വിധത്തിലാകുമായിരുന്നു. ഭാവിയില്‍ കാര്യങ്ങള്‍ മെച്ചപ്പെടും''- ബി എസ് പി അധ്യക്ഷ പ്രതീക്ഷ പ്രകടിപ്പിച്ചു.
