ലോക്ക്ഡൗൺ ലംഘിച്ച് അമിത വേഗത്തില് കാറോടിച്ച് കന്നഡ നടിയും സുഹൃത്തും അപകടത്തിൽപെട്ടു. കന്നഡ സിനിമാ താരം ഷര്മിള മാന്ദ്രെയും സുഹൃത്ത് കെ. ലോകേഷ് വസന്തും സഞ്ചരിച്ച വാഹനമാണ് ബെംഗളൂരുവില് അപകടത്തില്പെട്ടത്. ശനിയാഴ്ച അർധ രാത്രിയായിരുന്നു സംഭവം. കാർ പൊലീസ് പിടിച്ചെടുത്തു. വസന്ത് നഗറിനടുത്ത് ഇവര് സഞ്ചരിച്ച കാര് തൂണില് ഇടിക്കുകയായിരുന്നു. അപകടം നടന്ന ഉടന് തന്നെ ഇരുവരേയും സമീപത്തുള്ള ആശുപത്രിയില് പ്രവേശിപ്പിച്ചു. ഷര്മിള മാന്ദ്രെയുടെ മുഖത്താണ് പരുക്കേറ്റത്. കൂടെയുണ്ടായിരുന്ന സുഹൃത്തിനും പരിക്കേറ്റിട്ടുണ്ട്.
ജയനഗറില് വെച്ചാണ് അപകടം നടന്നതെന്നാണു ഇവര് ആദ്യം ഡോക്ടറോട് പറഞ്ഞത്. ഇതുപ്രകാരം പൊലീസ് കേസെടുത്ത് അന്വേഷണം നടത്തിയപ്പോഴാണ് വസന്ത് നഗറിലാണ് അപകടമെന്ന് മനസ്സിലായത്. പൊലീസിനെ കബളിപ്പിച്ച് കാർ കടത്താനാണ് തെറ്റായ വിവരം നൽകിയതെന്ന് പോലീസ് കരുതുന്നു. അശ്രദ്ധവും അപകടകരവുമായി വാഹനമോടിച്ചതിന് ഐപിസി 279, 337 വകുപ്പുകള് ചുമത്തി പൊലീസ് കേസെടുത്തിട്ടുണ്ടെന്നാണു വിവരം.