ഡല്ഹി: കൊവിഡ് പ്രതിരോധത്തിന്റെ ഭാഗമായി ഏര്പ്പെടുത്തിയിരുന്ന നിയന്ത്രണ നടപടികള് പിന്വലിക്കാന് കേന്ദ്രം സംസ്ഥാനങ്ങള്ക്ക് നിര്ദേശം നല്കി. മാസ്ക്, ആള്ക്കൂട്ടം, കൊവിഡ് നിയന്ത്രണ ലംഘനം തുടങ്ങിയ വകുപ്പുകള് പ്രകാരം കേസെടുക്കുന്നത് ഒഴിവാക്കണമെന്നാണ് കേന്ദ്ര ആഭ്യന്തര മന്ത്രാലയം പുറത്തിറക്കിയ ഉത്തരവില് പറയുന്നത്. 2005-ലെ ദുരന്ത നിവാരണ നിയമപ്രകാരം ഏര്പ്പെടുത്തിയിരുന്ന നിയന്ത്രണങ്ങള് പിന്വലിക്കാനും കേന്ദ്രം നിര്ദേശം നല്കി.
കൊവിഡ് മാനദണ്ഡങ്ങള് ലംഘിക്കുന്നതിന് കേസെടുക്കില്ലെങ്കിലും ആരോഗ്യമന്ത്രാലയം നല്കുന്ന നിര്ദേശങ്ങള് പാലിക്കണമെന്ന് നിര്ദേശമുണ്ട്. മാസ്കും സാനിറ്റൈസറും ഒഴിവാക്കാതിരിക്കുകയാണ് നല്ലതെന്നും കേന്ദ്രം വ്യക്തമാക്കിയിട്ടുണ്ട്. രാജ്യത്തെ കൊവിഡ് കേസുകള് കുറയുന്ന സാഹചര്യത്തിലാണ് കേന്ദ്രത്തിന്റെ നടപടി. അതേസമയം, അതത് സംസ്ഥാനങ്ങളിലെ കൊവിഡ് സാഹചര്യങ്ങള് വിലയിരുത്തി നിയന്ത്രണങ്ങളില് മാറ്റം കൊണ്ടുവരാന് സംസ്ഥാന സര്ക്കാരുകള്ക്ക് അധികാരമുണ്ട്. ഇന്ത്യയില് 2020 മാര്ച്ച് 24-നാണ് കേന്ദ്ര ആഭ്യന്തര മന്ത്രാലയം ദുരന്ത നിവാരണ നിയമപ്രകാരം മാസ്ക് നിര്ബന്ധമാക്കിയത്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
നേരത്തെ, കേരളത്തില് മാസ്ക് ഒഴിവാക്കുന്നതുമായി ബന്ധപ്പെട്ട് പ്രതിരോധ പ്രവര്ത്തനങ്ങള്ക്കായി രൂപീകരിച്ച വിദഗ്ദ സമിതിയിലെ അംഗങ്ങളോടും ആരോഗ്യവിദഗ്ദരോടും സര്ക്കാര് അഭിപ്രായങ്ങള് തേടിയിരുന്നു. മാസ്ക് ഒഴിവാക്കുന്നതുകൊണ്ട് പ്രശ്നങ്ങളൊന്നുമില്ലെന്നായിരുന്നു വിദഗ്ദ സമിതിയുടെ അഭിപ്രായം. കൊവിഡ് നാലാം തരംഗം ഇതുവരെ ഉണ്ടാകാത്ത സാഹചര്യത്തില് മാസ്ക് ഒഴിവാക്കുന്നതുകൊണ്ട് കുഴപ്പങ്ങളില്ലെന്ന് ആരോഗ്യവിദഗ്ദരും അഭിപ്രായപ്പെട്ടിരുന്നു. ഇതുസംബന്ധിച്ച് അന്തിമ തീരുമാനമെടുക്കേണ്ടത് മുഖ്യമന്ത്രിയുടെ അധ്യക്ഷതയില് ചേരുന്ന കൊവിഡ് അവലോകന യോഗമാണ്.