തിരുവനന്തപുരം: സിപിഎം പാര്ട്ടി കോണ്ഗ്രസില് പങ്കെടുക്കുമെന്ന കെ വി തോമസിന്റെ പ്രസ്താവനക്ക് പിന്നാലെ പ്രതികരണവുമായി കെ പി സി സി പ്രസിഡന്റ് കെ സുധാകരന്. താന് ആരെയും ഭീഷണിപ്പെടുത്തിയിട്ടില്ലെന്നും കെ വി തോമസിനെ പാര്ട്ടിയില് നിന്നും പുറത്താക്കുന്നതുമായി ബന്ധപ്പെട്ട തീരുമാനം ഉടന് ഉണ്ടാകുമെന്നും കെ സുധാകരന് പറഞ്ഞു. തോമസ് എ ഐ സി സി അംഗമാണ്. അതുകൊണ്ട് തന്നെ ഹൈക്കമാന്ഡുമായി ഈ വിഷയത്തില് ചര്ച്ച ആവശ്യമാണെന്നും സുധാകരന് കൂട്ടിച്ചേര്ത്തു. സിപിഎം സെമിനാറില് പങ്കെടുത്താല് ആരാണെങ്കിലും നടപടി സ്വീകരിക്കുമെന്നാണ് താന് കഴിഞ്ഞ ദിവസം വ്യക്തമാക്കിയത്. അതിനു ഭീഷണിയുടെ സ്വരമുണ്ടെന്ന് കരുതുന്നില്ല. വിഷയത്തിൽ വാർത്താസമ്മേളനം വിളിച്ച് വിശദമായി പ്രതികരിക്കുമെന്നും അദ്ദേഹം കൂട്ടിച്ചേർത്തു. അച്ചടക്ക നടപടിയിൽ കെപിസിസി തീരുമാനമെടുക്കുമെന്ന് പ്രതിപക്ഷ നേതാവ് വിഡി സതീശനും പ്രതികരിച്ചു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
പാര്ട്ടിയില് നിന്നും പലപ്പോഴും അവഗണയാണ് തനിക്ക് നേരിടേണ്ടി വന്നിട്ടുള്ളത്. നിയമസഭാ തെരഞ്ഞെടുപ്പിലും രാജ്യസഭാ തെരഞ്ഞെടുപ്പിലും സീറ്റ് നിഷേധിച്ചപ്പോള് പാര്ട്ടിയ്ക്കെതിരായി താന് ഒന്നും ചെയ്തിട്ടില്ല. ആരോടും അന്നും ഇന്നും സീറ്റ് ചോദിച്ച് കടുംപിടുത്തമുണ്ടായിട്ടില്ല. പാര്ട്ടി വിറ്റ് പണമുണ്ടാക്കിയിട്ടില്ല. എങ്കിലും തിരുത തോമസ് എന്ന് ഒപ്പമുള്ളവര് പരിഹസിച്ചു. തന്നെ പുറത്താക്കാന് കെ സുധാകരന് യാതൊരു അധികാരവുമില്ല. താന് എഐസിസി അംഗമാണ്. വര്ഗീയതയ്ക്കെതിരായി ബിജെപി വിരുദ്ധ പാര്ട്ടികള് ഒന്നിക്കേണ്ടതുണ്ട്. സ്റ്റാലിന് പങ്കെടുക്കുന്ന സെമിനാറിലാണ് താന് പങ്കെടുക്കുന്നത്. ആശയപരമായി സെമിനാറിന് വലിയ പ്രാധാന്യമുണ്ട്. അതിനാല് സെമിനാറില് പങ്കെടുക്കുമെന്നാണ കെ വി തോമസ് ഇന്ന് നടത്തിയ വാര്ത്താ സമ്മേളനത്തില് പറഞ്ഞത്.
